Den nos #Throwback awe ta ilustra Ivo Yanez cu tabata riba portada di FOCUS na juni 2015 den e edicion pa celebracion di Dia di Tata hunto cu su yiunan. El a conta e tempo ey cu e rol di un tata tambe ta uno cu ta marca bida completo di su yiunan y den su caso, sigur esaki ta un echo. Ivo ta recorda su estimado tata diariamente y a pesar cu el a fayece 8 aña (awo 13 aña) pasa, e ta keda bibo y sigur e persona cu Ivo a stima masha hopi mes. E fayecemento di su tata tabatin un impacto grandi riba su bida. Den exactamente 1 luna su heroe a bay y ey ta unda Ivo a descubri su adoracion p’e. Gran parti di Ivo su exito, ta basa riba con su tata a biba y e prome les cu el a haya di su tata tabata pa no pega nunca na material.
Kico ta bo recuerdo di infancia preferi?
Tempo cu mi tabata misdienaar na misa di Brasil y ta mi tata a hinca mi den esey. Mi tabata gusta haci esey y mi tabata anhela pa diadomingo yega, pa mi por sirbi misa.
Con bo relacion cu bo tata tabata?
Mi relacion cu mi tata semper tabata hopi bon, pero dia cu el a fayece mi a realisa cu e tabata miho di loke mi a pensa. Durante su malesa tabata e momento di mas horibel den mi bida. Mi tata ta mi idolo y mi a dura 3 luna plat emocionalmente y te dia di awe, ainda su ausencia ta haci mi dolor y falta.
“Semper mi a stima mi tata hopi, pero e 1 luna cu e tabata malo, mi a realisa con profundo mi stimacion tabata y mi mester bisa cu tabata e luna di mas dificil di ful mi bida”.
Con bo lo defini bo rol di tata na cas?
Mi rol ta basa riba e stimacion inmenso cu mi tin pa mi yiunan. E ta un amor cu no por compara y no ta igual cu niun otro. Nan ta mi debilidad di mas grandi den bida, door cu mi ta stima nan, mi ta bay surpasa e limite pa nan. Mi sa cu esey no ta bon, paso bo ta cay den e parti di consenti nan y asina ta lubida riba e parti di educacion. Mi stimacion ta igual pa cada un di mi yiunan.
Ki tradicion bo tata a pasa bo y abo ta pasando na bo yiunan?
Mi tata tabata un persona hopi religioso y el a inculca esey den mi tambe, pues pa tin fe den Dios y kere masha den dje y esey mi ta pasando na mi yiunan. Sin Dios bo ta nada, material ta algo pasahero.
Kico bo tabatin como mucha, cu awendia bo yiunan no tin?
Sin duda, e weganan di mucha! Ami cu mi ruman tabata inventa wega pa nos hunga y awendia mi ta wak mi yiunan y tur cos ta internet, celular y laptop.
Cua miembro di famia tabata esun cu mas a inspira bo den bida?
Definitivamente mi tata y mi mama!
Como adolescente, cerca ken bo tabata bay pa conseho? Y si bo mira bek, bo ta haya e consehonan aki tabata bon?
Mi tata y mi mama y sigur cada un tabata na su luga! Mi tata tabata tin un rol hopi importante den educacion di mi y mi ruman, sin kita afo e rol di mi mama.
Pero den nos caso, mi tata tabata mas na cas, door di su trabou como docente cu tabata permitie tin mas tempo cu nos na cas y tabatin e rol di educa nos y mi mama tabatin e rol mas den e parti financiero, ya cu e tabata traha na hotel.
Kico ta e cos mas bergonsoso cu bo mama of tata a yega haci cu bo?
Mi mama tabata un fanatico grandi di mi, tempo mi tabata hunga baseball. E tabata scucha e wega den auto y mane mi score, e tabata haci un beheit di otro mundo, bashando pito y tur. Mi tabata muri di berguensa y mi ta corda cu mi tabata pidie pa e keda cas y scucha e wega na radio, leu di veld.
Kico ta e ingredientenan clave pa fortalece un famia?
Amor, comunicacion, comprension y pordon.
Bo ta lamenta algo cu bo a desea di haci?
Nada di lamenta!
Con bo ta anda cu critica?
Mi a siña cu den e trabou aki bo no por complace tur hende, na cuminsamento di mi carera esey tabata molestia mi, pero segun bo ta crece, bo no ta worry cu critica destructivo, sino esunnan cu ta constructivo so.
Kico ta e 3 cosnan den bida cu nunca bo lo haci?}
1. Traiciona mi yiunan}
2. Papia malo di Aruba (mal promocion)
3. Keda sin drumi
Bo ta pensa cu yora ta un señal di debilidad?
Absolutamente cu no!
Kico ta e top 3 cosnan cu bo ta para p’e?
1. Honestidad
2. Transparencia
3. Balor
Kico ta loke bo ta mas gradici p’e?
E educacion cu mi a haya di mi mayornan.
Cua eror a siña bo e miho les di bida?
Mi no ta wak niun como un eror, tur cos mi ta considera como un les di bida, sea ta e malonan como e bonnan.
Bo ta kere cu ‘snitching’ ta un cos bon of malo den nos comunidad?
Mester bisa cu lamentablemente esey ta parti di nos cultura. Aruba ta un pais chikito y tur hende conoce otro y tur hende di un manera of otro ta papia di otro, sea bon of malo.
Kico bo tin mas; curashi of integridad?
Un balansa entre nan dos.
Bo ta considera cushinamento y haci limpi un trabou di hende muher?
No, pero djis mi no ta gusta hacie.
Cua ta bo strategianan pa tuma risico grandi?
Simplemente kere den bo mes, ami sigur ta kere hopi den mi mes y mi ta kere cu esey ta gran parti di mi exito.
Ta consistente a cambia bo bida?
Ta consistente ta tur cos! Mi ta kere den consistencia y esey ta e yabi di exito. Mi ta traha pa 27 aña caba na e mesun stacion di radio y pa 22 aña na e mesun planta di television.
Kico ta bo strategia pa reta bo yiunan pa haci mas?
Mustra nan e diferencia entre bon y malo y tur loke bida ta consisti di dje. Mi no ta mustra nan solamente e ‘bon’ di bida, manera bay vakantie, pero tambe mi ta mustra nan kico ta malo.
Ki importante aparencia personal ta pa bo?
Pa mi trabou esey ta hopi y sigur tur cos. Mi ta tene cuenta cu mi imagen, semper bisti bon, mustra bon constantemente y no slordig, mi ta cuida mi aparencia masha hopi mes.
Kico ta bo filosofia tocante paternidad?
Un tata ta esun cu ta duna amor, percura pa e yiu tin stabilidad, educacion, ta contento y ta emocionalmente bon. Hopi biaha e tata biologico, ta e tata cu ta percura di tur e cosnan ey, pero paternidad tambe kiermen e homber cu ta tene na cuenta e mucha su bienestar.
“Mester duna merito y balor na e ser masculino cu ta cria y educa su yiunan, tanto biologico como esun cu bo ta cria como bo yiu. Si por tin un balans entre nan dos, bo ta lanta e mucha manera mester ta. Loke ta mas importante ta e parti di responsabilidad y esey e ser masculino mester tin pa e por eherce e funcion di tata.”
Kico ta bo vision y meta pa bo yiunan?
Pa nan ta feliz y pa tur 3 hiba un bida feliz! Felicidad ta bin cu tur cos y mi ta prefera pa nan ta un pober, pero feliz.
Cua 3 palabra bo yiunan lo uza pa describi bo?
Hopi dificil, paso cada ta diferente, pero mi lo ta ansioso pa sa kico y con nan ta wak mi como tata.
Compara cu tempo cu bo a bira tata cu 18 aña y awendia, con bo ta defini e proceso?
Ful diferente! Mi tabata hopi hoben y sin experiencia y sigur inmaduro. Famia definitivamente no tabata na prome luga pa mi e tempo ey y como un hoben, bo tin otro meta, cu no tabata implica forma un famia. Pero asina mes, mi ta gracidi Dios cu mi tin un bunita relacion cu mi yiu di 22 aña y nos ta comunica y stima otro masha, a pesar cu el a nace den un temporada cu mi tabata hopi hoben y riba dje, nos ta comparti e mesun fecha di nacemento.
Cua di bo yiunan tin mas di bo caracter?
Cada un tin un tiki di mi. Idimara tin e parti straight y directo di mi, no ta ‘in between’. Zayon tin e bon gusto di mi y Zaynah tin e parti ‘shy’ di mi.
Kico ta locual ta haci Paola e muher special den bo bida?
For di prome momento cu mi a wak e, mi a realisa cu nos lo bay ta hunto pa semper. E no ta algo cu mi por describi den palabra, pero bo ta sinti un click. Y esey ta netamente loke a pasa, ora el a bin studio pa busca un premio cu el a gana.
Como pareha, kico boso ta gusta haci hunto?
Nos ta gusta sali bay come, wak un bon pelicula y gusta biaha, pues celebra bida hunto.
Con boso ta anda cu e parti profesional laboral, mirando Paola su rol den bo negoshi?
Tres aña (awo ocho) pasa nos a dicidi cu ta e momento pa Paola bin traha pa mi, door cu e trabounan a bira hopi. Ta e miho decision cu mi por a tuma pa mi compania y esey no ta afecta nos relacion na nada. Nos por separa e parti di bida profesional for di esun personal.
Con Paola ta anda cu bo popularidad den nos comunidad?
Mi ta kere cu bon! Paso e aña aki nos ta cumpli 11 aña casa (16 aña) y manera tur relacion, e elementonan di comprension y comunicacion ta hunga un rol importante.
Como un figura publico asina carismatico, bo a yega di haya bo den situacion di tin fanatico obsesivo?
Si y varios biaha tambe, pero nada cu mi no por a handle te awo!
Ki impacto Ivo 4 Life tin riba bo bida?
Mi mester bisa cu for di momento cu Ivo 4 Life a nace, e tabatin y tin tur sorto di impacto! Esey ta branding di mi programa y el a trece un cambio total den parti profesional di mi trabou.
“Ivo 4 Life ta un movecion completo y el a hiba mi na un otro nivel den e area profesional y mi ta gradici cada un di mi fanaticonan como tambe mi clientenan pa deposita nan confianza den mi programanan.”
Kico ta mas importante pa bo: ta un tata popular of un tata ehemplar?
Sin duda uno ehemplar, paso popular no ta algo cu bo tin pa semper, esey ta pasahero. Un tata ehemplar ta algo pa semper, door di e ehempel cu bo ta laga pa bo yiunan.
