E edicion di Focus Digitl di e luna aki tin e premiere di tres seccion nobo cu e expertonan riba cada tema: Daniela Kuipers-Ramos, Geraldine Alexander y Jessica Wolter. Daniela tabata riba e portada di october aña pasa unda el a conta con tempo e tabatin 11 aña, ora cu su mama a fayece, y na edad jong e mester a traha despues di scol pa por a come y paga su gastonan. Aunke e no tabata bay scol tur dia, door cu e tabata keda cansa di trabou, e tabata haya toch bon cifra na VWO. Awendia cu su 30 aña el a logra adkiri tur e metanan cu el a pone te cu awor; Bachelor, Master y un trabou den Gobierno Hulandes. Desde algun luna e tin su rednan social unda e ta comparti y motiva su seguidonan cu su storia, pa nan compronde y conecta cu nan ‘innerworld’ pa forma nan bida manera nan ta desea. Den su articulo e ta duna 3 tips con pa proteha bo salud mental durante e tempo di Covid.
Geraldine ‘Dina’ Alexander durante su carera di 24 aña como bankero, semper a sinti un pasion pa coaching, spiritualidad y e temanan relaciona cu intimidad. El a dedica mas cu 22 aña den inverti pa su crecemento spiritual. Na october 31, 2019 el a haya e oportunidad pa biba su pasion y el a bay en busca di un coach, cu lo por habri e portanan ey, y haci di su pasion su carera nobo. Su deseo ta, pa contribui na Aruba y mundo ta consciente di e importancia di nan intimidad y nan spiritualidad. E dosnan aki ta bay man cu man, pasobra si bo sa ken bo ta… bo bida intimo ta refleha esey. Den su prome articulo e ta elabora con for di cuminsamento di siglo 20, sex a keda electrocuta door di tecnologia. Un di e prome “gadgetsnan” cu a inventa, apart di mashin di cose, fan, toaster y ketel di te, tabata un “plug inn sexual stimulator” yama “VIBRATOR”.
E atraccion cu Jessica Wolter a haya pa siña mas con pa traha cu e cristalnan den e forma energetico, tabata e prome cos pa inicia e proceso aki como ‘Holostic Transformation Facilitator’. El a cuminsa na Aruba mes, compartiendo cu diferente persona consciente di nan ser energetico y esaki a yud’e na reconoce mas su energia y con pa cuida esaki. Despues el a sigui diferente practica den exterior. E ta un proceso di hopi estudio propio y compromiso personal pa honra e tempo dedica na e practica diario, y semper cu e apoyo di su maestronan. E prome articulo di Jessica e ta elabora con pa ‘Subi e Vibracion Energetico di Bo Hogar’.Na momento cu nos ta papia di vibracion energetico, nos ta reconoce e importancia di ta consciente di nos energia. Pero no por descarta tambe e energia di e espacio cu tin rond di nos y con esaki ta aporta na nos bienestar y harmonia.
