Kamala Harris a haci historia awe como e prome hende muhe eligi como vice presidente di Merca, cu ta di color scur y asiatico-americano. Awo Kamala Harris lo dirigi e pais hunto cu e president electo, Joe Biden, den un momento critico den historia, purbando di uni e pais despues di un par di luna amargo y wanta door di e aumento di e casonan di coronavirus. Kamala Harris a nace dia 20 di october 1964 na Oakland, California, y ta yiu di inmigrantenan: su mama di origen hindu y su tata di origen jamaiquino.
Despues cu su mama y tata a divorcia, Harris a wordo cria principalmente door di su mama Shyamala Gopalan Harris, cu ta un investigador reconoci di cancer di pecho y un activista di derecho civil. E tata Donald a bira un profesor di economia na Stanford University. E mama di Kamala a zorg pa tanto Kamala como su ruman muhe mas jong, Maya, mantene e lasonan di herencia cu India, criando nan cu e creencianan hindu y tabata hiba nan cada dos aña su pais di origen. Kamala Harris a studia na Howard University, University of California y Hastings College of the Law. E ta un politico y abogado mericano, cu desde 2017 ta desempeña como ‘junior senator’ di California.
Kamala Harris tin 6 aña casa cu Douglas Emhoff cu el a conoce tempo cu Harris tabata Fiscal General di California y Emhoff un abogado di Venable, un poderoso bufete multinacional. Nan a cera conoci cu otro riba un ‘blind date’.
Kamala tabata soltera pero Emhoff tabata divorcia y cu dos yiu homber grandi caba naci di su matrimonio di 25 aña cu Kristen Emhoff. Cu tempo y cariño, e yiunan a dicidi cu ‘madrastra’ tabata un termino horibel y a prefera di yame ‘Momala’, cu ta e palabranan entre ‘mom’ y ‘Kamala’. Emhoff no tabatin niun problema pa laga tur cos un banda pa apoya e carera di su casa, aunke el a wordo hopi critica pa esaki. Kamala Harris ta bay asumi su cargo dia 20 di januari 2021, hunto cu e presidente electo, Joe Biden, despues di a derota e actual president Donald Trump y vice president Mike Pence.
