E organisador di Miss & Mrs Top of the World Aruba 2020, Karena Maduro, ta conoci den mundo di ‘plus size’, modelahe y asta canto, organisando den pasado diferente evento manera festival di canto, fashion show y expo, pero nunca un certamen di beyesa. E certamen di Miss & Mrs Top of the World Aruba tabata algo completamente diferente cu e retonan diferente, unda cu e reto di mas grandi p’e tabata pa anda cu diferente caracter. Den su totalidad Karena ta haya cu e certamen a bay hopi bon, cu aki aya manera den tur proyecto nobo tin caminda pa drecha pa e siguiente. Sinembargo tur e anochinan sin drumi, e rush pa busca sponsor cu por cierto no tabata uno facil p’e door cu nos ta pasando den un crisis. Ademas di percura pa tur cos ta na ordo y e oranan cu el a pasa leu di su yiu chikito tabatin su fruto. E ta sumamente contento con tur cos a bay y tambe hopi conforme cu e resultado final. Tur esakinan ta e retonan cu a siñ’e en realidad di kico e ta traha p’e.
E certamen tabatin 6 reto oficial y door cu esaki tabata un certamen virtual, nan no mester a preocupa mucho cu e distanciamento social. Solamente pa reto number 2 cu tabata ‘sporstwear’, nan a haya nan confronta cu algun contratiempo door cu e shoot aki mester a tuma luga den My Fitness. Durante e dianan ey, e reglanan di protocol di DvG tabata hopi estricto, pero na final nan a logra realisa e reto aki toch.
Apesar cu e retonan tabata virtual, e parti final tabata algo cu semper tabata riba mesa for di comienso, pero nan no por planea nada wardando e reglanan suavisa. Ora esaki a sosode a cuminsa di biaha cu e planeamento di e anochi final.
E certamen aki en realidad tabata un deseo cu Karena tabatin di 2 aña pasa, desde cu el a haya e licencia, den e temporada cu no tabatin e pandemia. P’esey na momento cu e reglanan a suavisa tabata su oportunidad di haci su soño un realidad di un certamen real y na mes momento duna cada participante e experiencia di un certamen real. E sa cu e anochi aki lo ta uno inolvidabel pa cada un di nan. Na mes momento ta duna e oportunidad na e huradonan pa mira nan riba un otro plataforma, nan elegancia, desenvolvimento riba escenario, nivel di siguridad y spontanidad.
Pa Karena ta dificil pa bisa ki tabata e highlight di e anochi final, ya cu na varios momento e tabata para keto un rato y wak riba scenario, y su wowonan tabata yena cu awa di emocion, djis di pensa con special e momento ey tabata pa cada un di nan. E ta kere toch si, cu e highlight tabata na momento cu e candidatanan a haya e oportunidad di interactua cu e huradonan na momento di e pregunta final. Esaki tabata e momento unda cada un a demostra nan carisma y por a mustra Aruba completo cu nan no ta solamente bunita, pero tambe inteligente. E momento unda nan a sali y presenta nan mes den nan trahe di gala tambe sigur tabata un showstopper!
Di cada categoria e ganadora lo representa Aruba na december den e certamen internacional, esta Angelique Stuger, Sherene Winterdaal, Jennifer Lopez y Daniela Rodriguez, awo ta preparando pa e certamen virtual internacional, cu ta tuma luga aki un par di siman. Di parti TOTW Aruba ya nan ta cla cu nan prome reunion, unda nan representantenan a firma e acuerdo di nan participacion internacional. Fotografia profesional ta den man di e talentoso, Suhaila Alders, cu ta encarga cu ‘oficial profile photo’ di cada candidata, ya cu esaki tambe ta virtual y lo ta a base di potret y video, tambe entrevista y talento via zoom. Hopi exito na e candidatanan representando Aruba na e certamen internacional.
RESULTADO MISS & MRS TOP OF THE WORLD 2020
Miss Photogenic: Alicia Mangru
Miss My Fitness: Alicia Mangru
Miss Amistad: Angelique Stuger
Miss Social Media: Sherene Winterdaal
Best Hair: Geraldine Kock
Best Makeup: Alicia Mangru
2nd Runner-up Mrs. TOTW Classic: Vera Euson
1st Runner-up Mrs. TOTW Classic: Myrna Bislik
Mrs. TOTW Classic: Angelique Stuger
2nd Runner-up Miss TOTW Voluptuous: Izayra Tromp
1st Runner-up Miss TOTW Voluptuous: Geraldine Kock
Miss TOTW Voluptuous: Jenifer Lopez
3rd Runner-up Mrs. TOTW Voluptuous: Jennifer Geerman
2nd Runner-up Mrs TOTW Voluptuous: Shamira Arends
1st Runner-up Mrs TOTW Voluptuous: Alicia Mangru
Mrs. TOTW Voluptuous: Sherene Winterdaal
1st Runner-up Miss Top of the World: Daphney Alexander
Miss Top of the World: Daniela Rodriguez
