E edicion di Focus Digital pa e luna aki ya por download ‘gratis’ y asina disfruta di e revista mas gusta tanto pa su contenido como su estilo innovativo. Riba e portada di april ta ilustra Cesar Olarte, cu ta bayendo pa su di cinco decada cantando. Cesar ta den un etapa cu e tin mas experencia, mas madurez, hopi mas trankil, sabiendo precisamente kico e kier y unda e ta bay. El a siña acepta su mes y tur esunnan cu e ta stima pa ken nan ta.
E ta considera su trayectoria artistico uno hopi exitoso, paso si e parti e cuater decada cu e tin cantando, cada uno di nan ta uno cu el a logra hopi como artista, compositor, cantante y ‘entertainer’, no solamente na Aruba pero tambe internacionalmente. E highlight di su carera ta, naturalmente su voz, unda el a logra gana e premio mas busca pa tur artista na mundo, cual ta e Latin Grammy, cu e produccion ‘De Vuelta al Barrio’ cu Chichi Peralta y Son Familia na 2001.
Cesar ta comparti su experiencia cu e banda di Chichi, cu ta uno cu tur artista ta soña cu ne. Di por representa bo pais, di por canta na asina tanto otro pais grandi, haci radio y tv tour na asina tanto parti di mundo. Di por canta pa 250 mil hende na Cartagena, Colombia cu e artistanan grandi reconoci mundialmente. E ta conta ki el a experimenta y te cu e momento cu el a dicidi di bandona e grupo, y su alivio di ta bek na cas.
Nos lo sigui elabora riba e contenido di FOCUS Digital di april, cu ta un experencia unico pa ‘browse’ y lesa e revista, cu tin su contenido di calidad manera semper. FOCUS Digital ta acesibel via Apple Store of Android Google Play Store, cu por download e aplicacion aki gratis riba un smartphone of tablet.
