E tres seccionnan hopi gusta den FOCUS Digital di e expertonan: Daniela Kuipers-Ramos, Jessica Wolter y Dina Alexander, tin e luna aki tambe nan topiconan informativo riba nan area di experticio. DanielaKURA coach, trainer & speaker, ta comparti 3 tips con pa bo crea un ‘Mindset Ganado’. E prome tip ta; Pa sea consciente di bo MIND-SET, di dos tip ta; Pa no tene miedo di bo emocionnan of di cambia, y di 3 tip ta; Pa sa kico e necesidad ta bou di bo emocionnan. Ora bo parti e palabra den dos bo ta ripara cu e ‘mind’ ta un ‘set’ di patronchi cu ta influencia bo bida. Pa bo por tin un ‘winning mindset’ bo mester ta consciente di kico bo patronchinan ta y cua di nan bo mester cambia.
E sistema di nos Chakranan ta e tema escogi pa Jessica Wolter, cu ta splica kico ta un chakra. E palabra Chakra den sanscrito ta significa: wiel. Dus un chakra ta un wiel energetico, cu ta draai y cu ta ubica riba nos curpa fisico, pero tambe ta cubri tur nos curpanan energetico. Nos chakranan ta regula e energia di nos campo electromagnetico of aura, y nan ta ricibi, warda, transforma, distribui, ahusta e energia na cada parti y e glandulanan di nos curpa. Cada chakra ta asocia na un color specifico, cu na mesun momento tin un frecuencia electromagnetico. E splicacion completo por lesa pa asina haya e informacion kico e colornan ta significa y ki e piedranan asocia ta aporta na nos bienestar.
Dina Alexander, ta conta cu un sexinista ta manera un fashionista, cu ta encanta loke e ta haci y nan ta keda fascina di loke nan ta papia y comparti cu henter mundo! Un Sexinista™ di Entice Me ta un embahador pa yuda kibra tur tabu rond di sexualidad na Aruba y na henter mundo. Nan mision ta propociona e recursonan y educacion pa fortalece e relacionnan y e confiansa sexual di esunnan cu a experimenta e evento-, e trauma- of enfermedadnan cu a cambia nan bida. Nan vision ta pa yuda e sobrevivientenan di cancer y otro enfermedad door di reintroduci den nan bida un intimidad nobo.
Lesa e articulonan di completo DanielaKURA, Jessica y Dina den FOCUS Digital di april, cu ta un experencia unico pa ‘browse’ y lesa e revista, cu tin su contenido di calidad manera semper. FOCUS Digital ta acesibel via Apple Store of Android Google Play Store, cu por download e aplicacion aki gratis riba un smartphone of tablet.
