Bernie Madoff, e financiero cu a orkesta loke ta ser bisa di ta e ‘Ponzi scheme’ mas grandi den historia, a fayece na edad di 82 aña. E portavoz di Federal Bureau of Prisons a informa cu Madoff a muri 14 di april 2021 den Federal Medical Center (FMC) Butner na North Carolina. Aunke no a menciona e causa di e morto di Madoff, pero un fuente a bisa na Associated Press, cu el a muri pa causanan natural. Na principio di 2020, Madoff a bisa na The Washington Post, cu e tabata sufri di un insuficiencia renal terminal, y el a busca pa haya liberacion compasivo pa por biba e resto di su bida como un homber liber.”Mi tin un enfermedad terminal”, el a bisa den un entrevista telefonico cu e medio. “No tin cura pa mi tipo di enfermedad. Pues, bo sa, cu mi a sirbi. Mi a sirbi ya 11 aña y francamente, mi a sufri a traves di esaki”. Su solicitud a ser nenga na final di 2020.
Madoff a ser aresta na december 2008 pa acusacionnan di su empresa, Bernard L. Madoff Investment Securities, cu a estafa biyones di dollar tanto di individuo, negoshi como e organisacionnan benefico. El a wordo declara culpabel pa 11 cargo pa e delitonan grave relaciona cu fraude, labamento di placa, declaracionnan falso y perhurio. El a wordo sentencia na 150 aña di prison, cu el a cuminsa cumpli na juli 2009. Entre e tantisimo victimanan di Madoff tin e director Steven Spielberg, ex-propietario di New York Mets, Fred Wilpon, e actor Kevin Bacon y e premio Nobel di Paz Elie Weisel. Madoff y su casa, Ruth, a purba di comete suicidio despues di su aresto, su casa a afirma na CBS. Na 2010, e yiu di pareha, Mark cu tabatin 46 aña, a horca su curpa den su apartamento na Manhattan, riba e di dos aniversario di e aresto di su tata.
