Aunke e protocol di e realesa ta obliga pa no mustra e tipo di expresionnan aki, pa e famia real tabata imposibel pa contene nan emocionnan durante e ultimo despedida di Duke di Edinburgh. Reina Elizabeth II a despedi awe di e homber cu ken e tabata 73 aña casa, su forsa y apoyo, prins Philip. E entieronan di realesa britanico sa ta grandi, planifica durante añanan y cu presencia di monarkia- y mandatarionan di henter mundo. Pero e restriccionnan impone pa coronavirus, a obliga pa modifica e plannan pa e entiero di prins Philip, cu a fayece dia 9 di april, dos luna prome cu e lo cumpli 100 aña.

E ceremonia a ser limita na 30 invitado intimo, bisti cu tapaboca y cu distanciamento social. E acto a cuminsa cu un minuut di silencio prome cu e sirbishi religioso den St. George’s Chapel na Windsor Castle. Luciendo nan medayanan militar riba nan trahenan, e cuater yiunan y varios nieto di e pareha real a acompaña canando na pia tras di e Land Rover berde, specialmente diseña pa e duke pa hiba su caha di morto, durante un procesion cortico door di e hardinnan di e kasteel. E reina a sigui e stoet den un Bentley oficial, cu un dama di compania, y tabata e momento ey cu e camaranan a capta ora soberana a laga algun lagrima cay. Sin embargo, e monarca cu diaranson awo ta cumpli 95 aña, a sinta su so den e kapel pa despedi di su casa, e homber cu ken el a casa tempo cu ainda e tabata un prinses na 1947. Na e ceremonia, prins Charles tambe a mustra tristo pa e despedida di su tata, y ademas desde awo e ta como e cabes di e famia real britantico.

LEAVE A REPLY

Please enter your comment!
Please enter your name here