E siman aki a lansa e programa nobo “VOTA PA KEN?” Un programa (video podcast) informativo y educativo, cu tin como obhetivo pa informa e publico en general, pero specialmente e “hobennan” riba e vision y plan di cada politico, asina como votador tur por keda bon informa y tin un bista mas amplio pa yuda nan cu nan desicion di voto.
E programa ta wordo presenta door di tres hoben entre nan: Mauro Caralps (presentador di e programa Selfmade), Sharkk Gario y Samil Susebeek (presentadornan di e programa No Filter in Paradise). E formato di e programa ta estilo di un entrevista casual/ amical unda ta haci pregunta riba diferente topico, cu ta di suma importancia pa e tres hobenan aki y Aruba completo. E programa ta duna e politiconan e oportunidad pa comparti nan plan y vision pa e eleccion venidero y tambe di e forma aki haya e oportunidad pa conoce e persona tras di e nomber.
E programa ta dura mas o menos 45 Minuut y ta sali riba e pagina di facebook y website di Vota Pa ken. E setup tabata den man di Elite Studios y ta uno sumamente moderno y profesional. E programa ya tin varios politico cu a confirma, entre otro: Sra. Evelyn Wever Croes – lider di Partido Mep, Gilbert Webb – lider di Partido HTC, Ursell Arends – lider di Partido Raiz y hopi mas.
