Un concurso di beyea ta un competencia cu tradicionalmente ta enfoca den husga y clasifica e atributonan fisico di e concursantenan. Sinembargo cu tempo e concursonan a evoluciona pa inclui e beyesa interior, cu e criterianan cu ta encera e evaluacion di inteligencia, talento, personalidad, caracter y participacion den e actividadnan caritativo. E portada di edicion di Focus Digital di September ta resalta tres hoben hunto cu nan coach contando nan experencia den e mundo di beyesa.

Kelsey Westerburger ta conta con pa un tempo largo el a sinti cu si e no ta parce e modelonan riba Instagram, e no ta bunita. Of e standardnan di beyesa di sociedad mes, a haci cu su autoestima tabata hopi abou, y tabata sinti manera e no ta ‘fit in’. P’esey e por bisa cu participando den un certamen a lage sinti empodera. E momento cu e tabata riba stage den trahe di gala, el a sinti asina sigur di su mes y esey tabata super ‘empowering’. Algo cu ta preocupa Kelsey ta e salud mental di nos hobennan. E ta splica con e mes a lucha hopi aña cu depresion y ansiedad.

Ruchelline Zievinger a siña conoce su mes mas miho, conoce su banda fuerte y menos fuerte. E ta agradecido pa tur e conocemento ricibi participando den un certamen di beyesa. Un di e desafionan mas grandi cu Ruchelline a yega di enfrenta tabata trahando como boluntario. Esaki tabata momento cu e no por a haci nada mas pa e prome herido y mester a trata pa esun cu e tabata yudando sobrevivi. E trabou cu Ruchelline a nace pa traha ta como un trahado social. E lo kier yuda tur hende cu no por lubida e trauma cu nan a pasa aden, y ta bisa cu si e por, otro tambe por!

Xanthe Piña tabata un victima di bullying, unda el a laga otro persona defini su balor propio y influencia su bida diario, specialmente su aparencia. E confiansa propio ta loke mas e certamen a yuda na empodera su mes, el a transforma den un persona mas sigur di su mes y cu mas curashi. Awe e por bisa cu cara na laira, cu e ta un damita completemente diferente. E persona mas influyente den Xanthe su bida ta su kerida mama, cu el a sigui su conseho pa nunca laga niun situacion defini ken e ta como persona. E hendenan cu nunca a kere den dje, tambe a haci un impacto door no duna e opinion di otro mas importancia, cu esun di bo mes.

Roberto Avalo a experencia un cambio radical di bida y rumbo, ya cu el a pasa for di e carera cu el a studia na Venezuela, pa ta un estilista den tur sentido di palabra na Aruba. Nunca el a wak su mes como estilista, pero destino y Dios tabatin un les hopi grandi p’e. E prome candidata cu Roberto a conoce tabata Digene Zimmerman, Miss Aruba 2014, cu despues di su triunfo el a sigui desaroya te cu awendia e tin un cantidad di logro riba su nomber. Ademas di e parti di prepara e mucha muhenan pa luci bunita y impecabel, Roberto ta duna nan e miho consehonan, cu pa semper nan lo tin graba den nan curason.

Por lesa e entrevista emocionante di Kelsey, Ruchelline, Xanthe y Roberto den FOCUS Digital Magazine di september, cu ta accesibel ‘gratis’ via Apple Store of Android Google Play Store, cu por download e aplicacion riba un smartphone of tablet.

LEAVE A REPLY

Please enter your comment!
Please enter your name here