San Sebastian Film Festival 2021 a entrega e Donostia Award di su edicion number 69 na Johnny Depp. E actor a recoge e premio na Kursaal Auditorium como reconocimento pa su trayectoria. E ta ser califica como un di e actornan mas talentoso y versatil di cine contemporaneo.
Cu e premio aki, Depp a bishita e festival pa di tres biaha. Na 1998 el a bay cu Terry Giliam pa e pelicula Fear and loathing in Las Vegas y na 2020 el a bolbe pa e documentario Crock of Gold: Bebiendo con Shane MacGowan den cual e ta actua como productor y protagonista.
E premio aki ta yega den bida di Depp despues cu e actor a perde un demanda contra e tabloide britanico The Sun pa difamacion pa yame ‘batido di muhe’ despues di e denuncia di su ex casa, Amber Heard, pa maltrato. E hues a determina cu e actor a agredi su ex-pareha y a lage sinti temor pa su bida.
Johnny Depp a afirma cu el a converti den un victima di ‘cancel culture’ mientras e tabata prepara pa ricibi su prestigioso Donostia Award na San Sebastian Film Festival. E actor di 58 aña, a hura cu ‘niun hende ta safe’ di e movimento pasobra el a bira ‘asina for di control’. Un tribunal a autorisa Depp pa procede cu un demanda pa difamacion di 50 miyon di dollar contra Amber Heard.
Johnny Depp a haci e comentarionan aki prome cu el a subi escenario y acepta e premio otorga den reconocimento pa su trabou actoral asina elogia y admira, unda e strea di Pirates Of The Caribbean a yega hopi anima na un photocall pa e evento.
