Un marca di bikini na Merca a wordo acusa di edita e potretnan di nan propio modelonan, incluyendo Lucciana Beynon. Lucciana ta yiu di e multimillionario Travers Beynon y e beyesa venezolano, Ninibeth Leal (Miss World 1991), cu a haci su debut riba e catwalk pa OMG Swimwear na Miami na juli. E potretnan cu a wordo saca pa e fotografo di Getty Images ta mustra full diferente, cu e potretnan cu a wordo publica riba e Instagram di OMG Swimwear.
E potretnan a ricibi hopi critica diaranson ora e account popular riba Instagram, Celebface, a compara e potretnan retoca publica door di OMG Swimwear, cu e potretnan original di Getty Images. Riba e potretnan edita, ta notabel cu Lucciana tin e caracteristicanan mas fini, tambe nan a hisa su wenkbrouwnan y haci forma di su cara for di cachete te na e horeanan mas defini. Riba un di e potretnan por wak tambe cu nan a edita e forma di Lucciana su curpa, unda ta nota cu su cintura ta mas fini. Tambe e tabata mustra mas broncea cu su cuero edita cu un ‘airbrushed’ look.
E otro modelonan riba e runway tambe a ricibi e mesun tratamento di photoshop riba OMG Swimwear su Instagram, incluyendo modelo manera Karina Ramos, Aline Bernardes y Antje Utgaard. E siguidonan riba Instagram a critica e potretnan edita, bisando cu e decision cu OMG Swimwear a tuma pa photoshop e hende muhernan aki geneticamente bendiciona ta ‘un insulto’.
