E miembronan di Kiwanis Club of Aruba a reuni recientemente na Marriott Grand Ballroom pa instala e directiva pa e siguiente aña Kiwanistico. E directiva lo tin e responsabilidad di guia y lidera e club pa asina e miembronan por continua cu e bunita trabao di duna yudansa na esunnan di nos comunidad cu ta den necesidad.

E instalacion a wordo ehecuta door di Lieutenant Governor Natalie Daal di Kiwanis Club of Piscadera, Curaçao, cu tabata di bishita na Aruba.

E directiva nobo ta consisti di:

  • Presidente – Jokoeza Hooplot
  • Vice Presidente – Manaaf Badloe
  • Secretario – Gay Spellen
  • Tesorero – Norma Brinkenberg
  • Presidente Saliente – Ingmar Ramharakh
  • Director – Tracey Werleman
  • Director – Nathalie van der Linde
  • Director – Claudine Ho-Kang-You
  • Director – Daniel Driessen
  • Director – Nanni Larmonie

E miembronan aki a wordo instala, no solamente den presencia di tur e miembronan di Kiwanis Club of Aruba, pero tambe e invitadonan distingui di Kiwanis Club of Palm Beach, Kiwanis Club of San Nicolas, Kiwanis Club of Young Professionals Aruba, Quota Club of Aruba y Lions Club of Aruba. E mainta tabata uno increiblemente agradabel, danki na  Chris Kross cu a provee e entretenimento, Jair Versprey y Jersey Isenia cu a canta e himno di Aruba y Curaçao, Ariana Koolman cu a recita un bunita poema, y Ebby Schwengle cu e fungi como maestro di ceremonia.

E miembronan a tuma un momento pa duna nan respet y honor na defunto miembronan di Kiwanis Club of Aruba, Ray Farro y John Every, cu recientemente a fayece y conhuntamente a duna 100 aña di servicio comunitario. E Presidente Saliente, Ingmar Ramharakh, prome cu simbolicamente a traspasa su posicion na e Presidente nobo, a haci uzo di e oportunidad pa expresa un danki special na e directiva saliente pa nan tremendo trabao, y tambe na, Lieutenant Governor Natalie Daal, y Lieutenant Governor Saliente Patrick Melchiors pa nan guia durante e aña Kiwanistico. Sr. Ramharakh a gradici su sponsors cu a introduci’e den Kiwanis Club of Aruba, esta Giantonio Muller y Indra Pereira. Tambe e tabatin un gesto di aprecio pa Aurora Dijkhoff, cu tabata e prome persona pa convence pa postula su mes pa Presidente. Sr. Ramharakh a presenta un premio di ‘Rookie of the Year’ na miembro nobo, Nanni Larmonie, y un premio di ‘Teamwork of the Year’ na un team cu nan trabao a resalta: Indra Pereira, Tracey Werleman, Norma Brinkenberg, Ebby Schwengle, Gay Spellen y Nanni Larmonie.

Kiwanis ta un organisacion global cu ta consisti di miembronan boluntario, dedica na mehorando mundo henter, cu un enfoke special riba e muchanan cu ta den necesidad. Pa mas informacion di Kiwanis Club of Aruba, por bishita www.kiwanisclubofaruba.org

LEAVE A REPLY

Please enter your comment!
Please enter your name here