Recientemente KrossHart a lansa su album nobo yama Explora. Den e album aki por a tuma nota di varios cantica clasico di nos cultura local, cual a wordo completamente transforma den un bachi nobo, manera e piesa conoci “Cunucu di Seit”, canticanan conoci internacionalmente manera “My favorite things”, cu a haya un toke Arubiano y influencia Caribense. Tin tambe composicionan unico creacion di e hobennan cu ta lidera e proyecto y cu a colabora cu varios artista y musico regional y internacional.
E iniciativa aki a cuminsa for di aña 2020 unda cu KrossHart a biaha pa exterior y graba e diferente instrumentnan cu e musiconan na Belgica y Hulanda. Inicialmente a proyecto aki mester a wordo graba na Boston, pero esaki a transcuri net den e temporada cu a cera frontera cual a pone cu e ekipo di KrossHart mester a bin cu un otro alternativa y a opta pa biaha pa Europa. Despues di e lunanan di trabou duro y apesar di tur contratiempo y desafio cu nan a encontra nan mes cune como consecuencia di e pandemia, nan ta contento di finalmente por comparti nan arte musical nobo.
E prome cancion cu a wordo estrena di e album aki den luna di april 2021 tabata “Andicuri” cual ta un cancion cu a ser componi door di KrossHart y a ser interpreta pa Izaline Calister, cual sigur no ta un artista desconoci y ta un orguyo di e islanan ABC. Un cancion profundo cu ta pone nos refleha riba e buskeda di amor, paz, y felicidad, cu ta pone nos realisa cu tur esaki por ser haya den cada un di nos mes.
E di dos cantica cu a ser lansa ta un piesa instrumental titula “Black Hat” cual a ser lansa den luna di september y cu a ser inspira door di e artista Munir Hossn y su musica. E album nobo Explora ta conta cu un total di nuebe cantica cu sigur ta un gran homenahe na nos cultura local y regional, na unda nos por disfruta di nos herencia musical cu un toke moderno.
KrossHart ta un concepto cu a nace den e mente di Siegfried Hart y Chris Kross, dos musico local cu desde un edad hoben a mustra un aprecio grandi den preserva nos cultura. Cu trancurso di tempo KrossHart a crece y ta conta cu otro colaboradornan entre otro Susjaira Kerpens, cu ta un vocalista cu ta parti di e ekipo y cual a forma parti di tur dos album. Tambe ta conta cu e apoyo di Darwin Winklaar cu ta lidera e iniciativanan di mercadeo pa e grupo y Eva Croes cu tambe ta forma parti di e ekipo.
Mester menciona tambe cu den e luna di december KrossHart lo presenta varios concierto pa asina pueblo di Aruba por disfruta en bibo di Explora. Tur esaki no por a wordo realisa sin e aporte grandi di e instancianan Prins Bernhard Cultuurfonds y Unoca y cu semper a kere den e vision y a apoya KrossHart. Pa esnan cu kier disfruta e cancionnan aki por haci esaki via e plataformanan di streaming di musica y tambe via e medionan social di KrossHart.
