Awo si Pete Davidson oficialmente lo mester ‘keep up’ cu e Kardashians. E strea di 41 aña y e humorista di 28 aña ta hunto! E noticia di nan romance ta yega despues di varios date na e cuidad natal di Pete, cu ta New York y na Los Angeles.
Kim y Pete a ser mira prome cu man teni durante un paseo na Knott’s Scary Farm dia 29 di october, esaki a pasa poco despues di nan presentacion na ‘SNL’, unda e pareha a comparti un sunchi durante un sketch. Un par di dia despues di nan sketch satirico na ‘SNL’, nan a bolbe topa otro na un restaurant na New York. Tin rumor cu Pete a organisa un cena romantico pa e strea riba e terasa di un pizzeria na Staten Island.
Un hint nobo di nan supuesto romance ta ora cu e leyenda di hip-hop Flavor Flav, a publica un foto riba su Instagram di dje hunto cu Pete, Kim y Kris Jenner. Segun e tabloide Daily Mail, e pareha a reuni na e cas di e ‘momager’ pa celebra Pete su cumpleaño, cu tabata inclui pyama cu ta match di e coleccion nobo di Skims.
Mientras Kim ta cu Davidson, su ex casa Kanye West, a cuminsa sali cu un modelo cu yama Vinetra. West y Vinetra nan romance a parce di tuma un rumbo mas serio, ora e rapper di 44 aña y e influencer di 22 aña a atende nan prome evento publico hunto, cu tabata Kanye su debut di Donda Academy na Minneapolis. Page Six a publica den januari cu Kim tabata separando di Kanye, cu ken e tin cuater yiu: North (8), Saint (5), Chicago (3) y Psalm (2). El a pidi pa su divorcio den februari. Di banda di Davidson, e tabata anteriormente comprometi cu Ariana Grande, y tambe a date Cazzie David y Phoebe Dynevor.
