Manera a anuncia cu ya e di 16 edicion di Focus Digital Magazine ta accesibel riba e plataformanan digital. Awo ademas di Apple iStore y Android Google Play Store, e revista ta tambe riba www.focus.aw (Menu Tab FOCUS DIGITAL). Conoci durante su trayectoria di 26 aña di existencia pa ilustra e enlacenan matrimonial di mas romantico, cu ta resalta pa nan bunita storia y celebracion, den e edicion di december e aña ta highlight un bunita pareha.
E hoben pareha, Marifer Aguirre y Matisse de Jong, a crece na Aruba y nan a atende Colegio Arubano, y desde 2007 nan tabata conoce otro for di scol, cas y fiesta door cu ruman mayor di Marifer ta amigo di Matisse. Sinembargo nan no a realmente papia cu otro te ora Marifer a muda pa Hulanda na 2012, despues cu Matisse a muda na 2010. Eynan nan a cuminsa papia y a ripara cu nan tabatin hopi en comun. E prome date di nan tabata na Vapiano, un restaurant na Den Haag, hunto cu Marifer su tata y ruman. Marifer su tata a dicidi di ‘crash’ e date y join cu su ruman tambe! E ta un experiencia hopi pret ora nan pensa bek riba e dia aki.
Despues di añanan sin bin Aruba pa fin di aña, Marifer y Matisse a dicidi pa porfin pasa Pasco y Aña Nobo na december 2018. Noche Buena a yega y nan tabata manera semper na cas di famia Oduber, pero e anochi a wordo ‘cut short’ door di Matisse y tata di Marifer, cu a pidi nan bay cas pasobra nan tabata cansa. Nan a yega cas 3’or di mainta y nan a ser pidi pa habri e regalonan bou di e kerstboom. Tur regalo, menos un caha grandi no a wordo habri, y a resulta esey tabata e regalo di Matisse pa Marifer.
Esaki tabata e comienso di un speurtocht rond di cas, paden y pafo pa 3or di madruga. E ultimo hint tabata pa wak bou di e kerstboom y eynan un puzzel cu Matisse a traha mester a wordo decifra. Ora Marifer a logra habri e puzzel, den dje tabatin e renchi… Matisse a hinca riba un rudia y a puntra e pregunta crucial. Marifer no por a ni papia pero a logra saca un: “ofcourse!”. E tabata e manera cu Marifer semper a anhela, cu su mayornan presente y den un manera romantico pero toch ‘low-key’.
E tabata un dia inolvidabel cu Matisse & Marifer de Jong – Aguirre Broca a celebra na manera cu nan tabata kier, un celebracion intimo den aire liber, pero alabes na grandi na Aruba. Esaki tabata nan deseo despues di a casa aña pasa na Gemeente Capelle aan den Ijssel na Hulanda, riba e unico dia cu solo a sali despues di e simannan di yobida.
Den tur aspecto dia 9 di october 2021, e fecha di nan prome aniversario di nan union civil, tabatin su significacion den cada detaye. Nan no por a stop di smile di con contento nan tabata di por a celebra e union aki, di un manera sublime. Haya sa di tur e detayenan unico y special di e celebracion di Matisse & Marifer, y cu ilustracion fotografico fabuloso den edicion di Focus Digital Magazine di december.
