Varios celebridad a topa cu nan amor den 2021, pero Jennifer Lopez y Ben Affleck ta un ehempel special. Nan a sorprende henter e planeta pa bay bek hunto despues di nan break di 17 aña. Tira un bista riba e otro ‘celebrity couples’ di 2021, cu nan romance a ser hopi comenta.
E drummer di Blink-182 y e ruman grandi di e clan Kardashian-Jenner ta entre e parahenan sorpresa di 2021. Travis Barker y Kourtney Kardashian a haci nan relacion publico. Incluso tin plan pa casa y e posibilidad di tin yiu hunto den un futuro no hopi lehano.
E aña aki, un di e solteronan di oro di Hollywood, Henry Cavill y Natalie Viscuso a topa otro, Natalie ta vicepresidente di Television & Digital Studios division di Legendary Entertainment, cu a produci ‘Man of Steel’ protagonisa pa e propio Henry Cavill,
Despues di un cantidad di rumor, e relacion a keda confirma entre Adele y Rich Paul. E ta agente deportivo fundado y CEO di e agencia deportivo Americano Klutch Sports. E ta e miho amigo y manager Lebron James.
Riba e Dia di San Valentin, Kendall Jenner y Devin Booker, a anuncia oficialmente nan relacion. Kendall sa ta hopi discreto ora ta trata su relacionnan, p’esey kisas e strea di NBA di Phoenix Suns, por ta un homber imporante pa Kendall.
Un pareha cu ta mustra super namora ta Rita Ora y Taika Waititi, cu ta actor, director, guionista y productor. Nan tabata hunto na MET Gala y a cana hunto riba e red carpet. Nan a cuminsa ‘date’ na comienso di maart 2021, pero a trata di mantene secreto.
Poco despues di nacimento di nan yiu Stormi, Kylie Jenner y Travis Scott a termina nan relacion, pero den 2021 nan a bolbe y a converti den un di e parehanan di aña. Na augustus nan a anuncia cu tin un segundo yiu na caminda.
Tom Cruise y Hayley Atwell a conoce otro na e set di ‘Mission: Impossible 7’ y tur cos a parce di tabata fantastico entre e pareha. Pero na october e actornan supuestamente a termina nan romance y a prefera di keda amigo.
