E coach di Thessaly Zimmerman, ta sinti’e sumamento contento y hopi satisfecho cu Miss Aruba a logra posiciona su mes den Top 10 Miss Universe 2021. Esaki ta un meta cu Anoutcka Koolman-Burleson kier a logra for di tempo cu el a coach Kanisha Sluis di Corsou, cu a cay den Top 10 di Miss Universe 2015. El a keda cu un dolor na su curason, door di a yuda un otro pais y no esun di dje mes. Sinembargo e ta enfatisa cu e mester a cambia e sistema con pa traha cu Miss Corsou y Miss Aruba. Algo importante tambe e ta bisa ta, cu e pueblo ta mira mundo di beyesa diferente.
Cu e logro unda dos diferente pais a yega den e finalistanan ta keda demostra, cu e sa kico e ta papia y domina, y no ta simplemente un ilusion. Su deseo di mas grandi ta pa Aruba logra no solamente ta den e finalistanan, pero tambe pa logra e corona maximo. Durante Thessaly su estadia na Israel, Anoutcka tabatin contacto cu ne diaramente y constantemente, Nan tabata planea e anochi anterior, cua ta e look pa e siguiente dia, tambe e stategia na cada evento pa asina Thessaly ta prepara. Un punto hopi importante ta cu Thessaly ta obediente y enfoca, cu pa Anoutcka tabata un placer trahe cu ne.
Entre e señalnan cu Thessaly Zimmeman tabata fuerte ta cu for di Aruba caba, na momento cu el a haci su entrevista. Esaki a bay super bon mirando cu e ta un mucha muhe cu contenido, Anoutcka a remarca cu e candidatanan ta haya normalmente 45 minuut, mientras Thessaly a haya 1 ora y 15 minuut pa por a papia. Su curriculum vitae tabata largo y interesante, y bon hinca den otro pa asina e por presenta algo di nivel. Thessaly hunto cu Bahamas y Honduras tabata e candidatanan pa ta e cara pa Carnival Lines, esey tambe tabata otro señal ora un sponsor grandi tabata cla pa mencione como nan cara. Algo otro tambe tabata cu constantemente nan tabata pidi Aruba pa diferente evento, y semper nan a pone hunto cu e paisnan grandi manera Thailand, Mexico, India, Filipinas y Paraguay.
Riba e pregunta na Anoutcka, si e hecho cu Thessaly tabatin experencia caba den e mundo di beyesa tabata na su fabor, el a contesta enfaticamente cu e no ta kere cu esey lo a hunga un rol. Miss Universe ta un eleccion riba su mes cu tin su concepto pa loke nan kier. P’esey diferente candidata cu tabata constantemente riba potret no a cay mes den e finalistanan. Loke si e ta kere ta, cu ora bo kier algo di berdad y ta determina pa ‘cueste lo que cueste’ logra bo meta. Mescos cu Kanisha e por bisa tambe, cu Thessaly ta un persona obediente, transparente y su mes, cu no ta laga niun hende influencie.
Loke segun Anoutcka por tabata na fabor di Thessaly tabata su experencia como deportista, representado Aruba internacionalmente como tenista. E ta enfoca y sa cu e tin cu scucha di su coach. Door cu e ta enfoca, e por a logra haci tur cos manera cu mester ta, cu a traha na su fabor. Pa loke a ser menciona cu su contesta ta ‘vrijpostig’, Anoutcka ta bisa cu loke nan ta busca ta un hende autentico, real, cu por haci un joke y por saca su mes riba un stage. Thessaly ta gusta actuacion, pues tin e parti di comedy den dje y Steve Hardy tabata prepara p’esey. Loke Miss Universe kier ta hende muhenan real cu por papia y hari sin perde respet.
