E abogado di Carlos Marin, e strea di Il Divo, a revela awe cu e cantante a haya e injeccion di e vacuna Janssen, conoci como Johnson & Johnson jab, prome cu el a muri di Covid den hospital. Esaki a bin ora cu e ex-casa di Marin, Geraldine Larossa, mas conoci pa su nomber artistico Innocence, a kibra silencio cu un tributo emotivo riba Instagram, bisando cu e cantante ta laga un bashi grandi den su bida.
Carlos Marin lo ser dera na Spaña den e trahe caracteristico di Armani, cu el a bisti ora e tabata haci presentacion rond mundo, pa asina e por canta awo den Shelo pa e angelnan, E fanaticada y simpatisantenan tambe por t’ey presente pa mustra nan ultimo respet durante e velatorio publico cu lo tuma luga na Madrid, ora e curpa yega na e capital Spaño for di Reino Uni, asina e ruman muhe di Marin a revela.
Alberto Martin, e abogado di Carlos Marin, a afirma na un canal di television spaño, cu e cantante a tarda di bay Manchester Royal Hospital despues di a bira malo te cu 7 di december, cual por a hunga un rol den e fatal desenlace, cu a laga miyones di fanatico di Il Divo rond di mundo desconsola. El a describi e morto di e cantante como un ‘mal soño’ cu a laga su amigonan y sernan keri sin consuelo.
Martin a bisa cu e cantantenan a tuma ‘tur e precaucionnan’ pa proteha nan mes di e virus, pero nan ta kere cu e cantante a keda contagia cu Covid na Gran Canaria, ora e grupo a biaha pa Sunshine Island fin di november pa un concierto. No tabata mucho cla ki tempo Carlos Marin a haya e vacuna Janssen, cu ta rekeri solamente un solo inyeccion sigui pa un booster shot al menos dos luna despues. Ayera a keda revela cu Carlos Marin a lucha contra Covid den secreto na december 2019 durante un gira navideño di Il Divo na Merca, y e virus a lage cu dificultad pa hala rosea y tabatin mester di zuurstof.
