Nguyen Thúc Thuy Tiên (23) di Vietnam, Miss Grand International 2021, lo corona su sucesora na Sentul International Convention Center den e di dies edicion di e concurso di beyesa internacional, cu su cede ta na Thailand. E certamen a ser funda pa Nawat Itsaragrisil y Miss Grand International ta un di e seis concursonan grand slam internacionalmente. E otronan ta Miss Universe, Miss World, Miss International, Miss Earth y Miss Supranational.
Durante e ultimo añanan, e concurso a bin haya hopi impacto na nivel mundial door di e cantidad grandi di participante. Aruba no tin ningun representante den e certamen aki, pero Curaçao tin un fuerte candidata den persona di Kanisha Sluis, cu a resulta den Top 10 Miss Universe 2015 na Las Vegas. Kanisha cu tin 26 aña y ta un studiante di logopedie, a post riba su rednan social cu despues di 7 aña e ta bolbe den certamen di beyesa como Miss Grand Curacao 2022.
Segun e reglanan di e organisacion di Miss Grand International, pa eligi e ganadora mester tene na cuenta e cualificacion di e candidatanan a lo largo di e competencia. Desde cu nan yega e concurso te dia di e coronacion momento cu celebra e show final pa eligi e ganadora na Bogor Regency, Java Occidental, Indonesia dia 25 di october 2022.
E huradonan y e organisacion di e concurso no ta cualifica solamente imagen estetico di e concursante, pero e aspectonan manera rasgo di su personalidad, figura corporal di reina di beyesa, confiansa como modelo, vestuario, conocimento, actitud y habilidad di comunicacion, entre e rekisitonan. Ademas cu e candidatanan mester fit den e perfil exigi pa Miss Grand, nan mester ta entre 18 pa 29 aña di edad.
