E super exclusivo ‘pageant guru’, Anthony Romeo Bryson, cu durante e ultimo añanan a coach exitosamente su candidatanan pa yega den top, a logra e final di un soño cumpli cu R’Bonney Gabriel como Miss Universe 2022. E añanan di preparacion, dedicacion y conocemento hinca den un di su tanto talentonan, cual ta coach candidata pa certamen di beyesa.
Anthony tin 3 aña caba yudando R’bonney logra un di su soñonan, paso semper el a mira e potencial den dje, p’esey como coach y amigo semper nan a push p’e no ‘give up’ y sigui su crecimento personal, mirando cu e ta reuni tur cos pa ta un Miss Universe. Esaki tabata R’bonney Gabriel su ultimo ‘try out’ y nan a bay extra duro for di e certamen di Miss Texas te na Miss Universe.
Anthony a pone un meta pa bay e ‘extra mile’ e aña aki invertiendo tempo y forsa den su reinanan y esaki ta locual a hiba nan na e premio mayor y tambe un posicion den Top 5 den e certamen di Miss Universe 2022. Ademas di R’bonney Gabriel corona como Miss Universe 2022, el a logra tambe top 5 cu Miss Curaçao, Gabriela dos Santos, cu Anthony ta describi como su obra maestra personal! Anthony Romeo Bryson ta comparti hopi informacion interesante den Focus Digital Magazine di februari, cu ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL)
