E aña aki por presencia un eleccion bek pa eligi e proximo Miss Universe Aruba dia 20 di augustus na Renaissance Convention Center. E anochi aki cinco candidata ta bay competi pa scoge e representante di Aruba pa e certamen di Miss Universe 2023 na El Salvador. Focus a reuni e cinco beyesanan cu ta den conkista di e corona riba e portada di augustus. Milenka Janssen, Lorainne Oduber, Anaisa Orman, Gavriëla Bozo y Karol Croes ta comparti nan pensamento kico e certamennan di beyesa ta nifica den e mundo actual.
Milenka ta pensa cu hopi di e comentarionan negativo tocante certamen di beyesa ta bin di e hendenan cu en realidad no sa kico e certamennan ta y di kico nan ta trata. El a nace na Hulanda pues originalmente e no tabata su soño participa pa Miss Aruba, pero si pa Miss Universe, p’esey ora el a haya e oportunidad e tabata excita pa por participa despues di a muda pa Aruba.
Pa Lorainne e importancia di e concursonan di beyesa den e mundo actual ta cu un ser femenino no solamente por crea bunitesa unda cu e bay, pero un cu por trece cambio positivo y innovativo den nos mundo. Despues di a participa na 2019 den e certamen di Miss Aruba, e ta mira esaki como e oportunidad cu ta bini cu ne, en bes di mire como un otro certamen.
Anaisa su deseo semper tabata pa competi den e certamen di Miss Universe Aruba, pero no por a participa como el a haya yiu y e reglanan di e certamen tabata stricto, cu ser mama of ta den pareha ta prohibi pa competi. E kier pa e generacion actual sa, cu djis pasobra un hende muhe cu haya yiu na un edad hoben no ta nifica cu e metanan proponi no por worde alcansa.
Gavriëla desde mucha tabatin e soño di participa den un certamen. E deseo aki hunto cu su identidad a perde ora el a drenta adolescencia durante un temporada di depresion. Awo e ta cumpli dos di su soñonan, uno pa por participa y di dos cu pa medio di e plataforma aki tuma bida como un oportunidad pa crea un efecto transformativo pa tur cu mester ayudo, y e amor di un curason cla pa tende.
Karol tempo e tabata un teener a representa Aruba exitosamente den certamennan internacional. Esaki a siñ’e na un edad hoben, cu si bo soña den grandi, kere den bo mes y traha duro bo por logra tur cos. Awendia loke e ta haya mas importante ta con bo lo uza e plataforma pa haci un impacto positivo. Door di uza bo stem y influencia pa papia riba e temanan cu bo ta haya cu mester mas atencion.
Den Focus Digital Magazine di e luna aki por lesa mas di cada candidata y cu diferente potret saca pa KURO, cu a mustra un biaha mas su tremendo talento como fotografo. E revista ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
