Kiwanis Club of Aruba a otorga un reconocemento na Kailen Wouters, cu a conkista World #2 den e campeonato mundial di UCI BMX na Glasgow, Escosia. Aunke Kailen ta hopi jong, e tin un trayectoria impresionante, unda el a inicia como ‘strider’ na e edad di 1 aña y mey. Como strider el a hasta competi na Merca y Curaçao titulando campeon na varios ocasion. Den transcurso di su carera como deportista di BMX, el a pasa di strider pa bais di pedal y sigui pa bais di cross. Durante su carera di BMX, Kailen Wouters ta carga e titulo di campeon pa 4 aña consecutivo como Campion Nacional den su respectivo categoria na Aruba.
Kailen a participa den diferente careda internacional y na diferente pais rond mundo manera na Alemania, Colombia, Curaçao, Hulanda y Merca. Na 2021 Kailen ta logra termina den e ‘national ranking’ di Merca na di 8 luga. Na 2022, Kailen ta logra yega final den mundial na Glasgow, Schotland y a keda na di 2 luga di mundo den e categoria di su edad e tempo ey. Apart di BMX, Kailen ta forma parti di ‘Aruba Dolphins Swimming Team’ y ta competi regularmente ganando diferente titulo den e deporte aki. Kailen tin 2 aña ta competiendo den ‘Kids of Steal Triathlon Competition’ y ta logra titula campeon na ambos ocasion den su categoria.
Kailen ta bay e scol EDUCampus Aruba cu ta dune e espacio necesario pa e por competi y practica su deportenan pa representa Aruba den exterior. Ademas di e deportenan menciona su pasatempo ta hunga futbol cu su amigonan, bodyboarding y snorkeling. Su meta ta pa mantene su mes den top di su deportenan, sigui train duro y defende su titulo mundial en busca di e titulo maximo di Campeon Mundial. Kailen tin tres careda mas pa competi na Merca e aña aki. Na november lo tin e competencia renombra BMX USA Grands Nationals na Oklahoma, Merca. Kailen ta forma parti di e team Nr. 1, esta J&R National Team USA y nan lo participa pa e titulo nacional.
Kiwanis Club of Aruba ta duna merito y reconocemento na Kailen pa su pasion, dedicacion y determinacion pa sigui engrandece su talento como deportista di BMX. KCA ta otorga Kailen un donacion completo pa por participa den e gran competencia di BMX USA Grands Nationals na Merca. Alabes ta desea Kailen tur clase di exito y ta apoy’e pa e por logra e titulo maximo.
