KICO NOS A SIÑA DI NOS PISCADONAN

For di Lama pa Stoof: Tabatin un tempo na Aruba caminda esaki tabata normal, ora pisca tabata move for di lama pa stoof den cuestion di ora, no como un declaracion culinario, sino pasobra simplemente e mester tabata asina. Loke tabata sali for di awa tabata determina kico tabata wordo comi. Nada no tabata wordo malgasta. Cabes di e pisca, weso y tur cos tabata drenta den wea.

Sabor tabata bini di ripiticion, no di invencion y e proceso tabata wordo comprende sin wordo splica y sin wordo documenta. Den su seccion mensual “Cushina Caribense” den Focus Digital Magazine, Gerald “Gino” Kock ta duna como un gran ehempel e sopi Arubiano yama ‘Aw’i Playa. E receta aki ta wordo pasa di generacion pa generacion y tin mas di 200 aña di existencia.

Minimalismo pa Necesidad y e Renacemento di Aw’i Playa: Esaki ta un sopi specialisa cu e piscadonan tradicionalmente tabata prepara eynan mes na canto di lama. Manera e storia ta conta, ora nan tabata bolbe for di lama y e cas tabata hopi leu ora nan tabatin hamber, nan tabata tuma Cabricuchi (pisca local) of otro pisca y prepara un sopi cu ne. E unico ingredientenan ta siboyo y yerba di hole; asina cu e awa herbi y e ingredientenan baha na fondo di e pot, e pisca fresco ta wordo añadi.

Credito: Byron Boekhoudt y Ronny ‘Miniman” Christiaans.

Si nos por corda con pa transforma awa di lama y un macuto di ingredientenan local, nos por transforma e historia di nos cushina for di un di consumo pa uno di auto-suficiente y creativo. Door di pone e sabiduria di nos piscadonan den centro di tur e discusion aki, y tambe door di duna balor mereci, nos ta permiti nan guia nos pa un futuro caminda e fortalesa di nos isla y su platonan ta mes profundo y eterno cu e lama.

Den e revista di e luna aki, Gino Kock ta elabora ampliamente riba “Loke Piscadonan ta Siña nos” –  “Ora e Custumbernan Cambia” y “Loke no por wordo Ripiti”. Awendia, nos platonan di pisca no ta disparciendo completamente, pero nan ta cambiando enormemente. Nan ta wordo simplifica y tin biaha sirbi sin e contexto cu antes tabata duna nan balor cu nan merece y sin ningun intencion.

Loke wordo haci cu nos herencia culinario ta importante, pasobra ora su origen wordo lubida, algo mas ta wordo perdi. No e cuminda mes, sino e respet cu antes tabata bin hunto cu ne. Y tras di e plato ey, tin ainda esunnan cu ta forma parti di nos cadena di alimentacion. Esey ta e piscado cu ta sali prome cu luz di dia, cu ta traha sin descansa y cu ta trece algo bek cu mester wordo respeta.

Como Culinary Ambassador pa World Food Travel Association (WFTA), Gino Kock tabatin e oportunidad di por a mira cu su propio wowonan con e tradicionnan di cuminda, creatividad y conocemento local por fortalece comunidadnan y crea oportunidadnan real. Su mision principal ta pa preserva y promove e cultura culinario y herencia tanto di Aruba como e region di Caribe. Por lesa e articulo completo “Kico nos a siña di nos piscadonan” den e revista, cu a wordo skirbi den reconocemento na e piscadonan cu nunca a bolbe, perdi den e mesun awanan cu antes y te awe ta sostene nos. E revista ta accesibel gratis via Apple Store, Android Google Play Store y www.focus.aw
(Menu Tab FOCUS DIGITAL)