E estilista internacional, Roberto Avalo, a sinti’e hopi honra y agradeci pa haya e oportunidad pa bolbe forma parti como hurado di Miss Teen Curaçao. Como estilista oficial di Miss Universe 2024 na Mexico tabata un privilegio pa mira cu su criterio profesional ta ser balora. E hecho cu nan a confia den su vision di beyeza y liderazgo pa yuda evalua e candidatanan ta algo cu e ta aprecia profundamente. Despues cu e tabata hurado na 2023, Roberto a pasa na forma parti di e ekipo di Miss Teen Mundial Curaçao, cu a logra conkista e titulo di prome finalista.
E cualidadnan cu Roberto a busca ora di scoge Miss Teen Curaçao 2026 tabata hopi mas cu solamente beyeza fisico. El a busca personalidad, autenticidad, disciplina, liderazgo, confiansa propio, habilidad di comunica y e deseo genuino di representa su isla cu orguyo. Un representante internacional mester tin presencia, pero tambe caracter.
E elementonan manera beyeza, personalidad, confiansa y presencia riba escenario tur tin peso ora di scoge un miss. Roberto ta bisa: “Beyeza por habri porta, pero personalidad y confiansa ta locual ta laga un candidata destaca. Presencia riba escenario ta resultado di preparacion, disciplina y siguridad den su mes. Ora tur e aspectonan ta den balansa, bo por identifica un berdadero embahadora”.
Loke a impresion’e mas di e candidatanan di Miss Teen Curaçao e aña aki tabata nan nivel di compromiso. E por mira cu e organisacion a inverti tempo den prepara nan. E candidatanan a mustra madurez, determinacion y un deseo real pa representa Curaçao na nivel internacional. Esaki ta un señal positivo pa futuro di e industria di certamen di beyeza na Corsou.
Roberto Avalo ta conta con traha den un ambiente multicultural a influencia su estilo y ta duna tambe su punto di bista riba e diferencia entre e certamennan na Aruba y Corsou den Focus Digital Magazine di e luna aki. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
