Nos soño ta un pilar fundamental di nos salud. E calidad di soño por ser afecta no solamente mainta door cu nos tin menos energia fisico, pero tambe nos salud mental y emocional. Akibou algun conseho con pa logra un miho soño anochi.
Uza menos celular
Un estudio publica den e revista Frontiers in Psychiatry a mustra cu e studiantenan cu mas ta uza celular anochi tabatin e calidad di soño mas malo. E investigadonan a descubri cu uza celular despues di 1’or di madruga tabata multiplica 3 biaha e posibilidad di drumi malo. Kiermen pa aumenta e posibildad pa drumi bon, ta miho pa laga un banda e pantayanan por lo menos 1 ora prome cu bay drumi.
Come alimento of producto rico den melatonina
Melatonina ta un hormona cu nos tin presente den nos curpa y cu ta afecta nos soño.
E ta ser produci y libera segun e momentonan di dia, segun e nivelnan di luz y scuridad.
Algun alimento cu por yuda bo di forma natural pa por pega soño mas lihe ta noten, yoghurt y lechi.
Drumi mas cu 6 ora
E duracion optimo di soño ta gran parti hereditario. Pero diferente encuesta a mustra cu e duracion promedio di soño di un adulto ta aproximadamente 7 pa 8 ora. E website di World Sleep Day ta splica cu tecnicamente, e specialistanan di soño ta bay di acuerdo cu e rango di 6.68 – 10 ora di soño pa anochi ta e cantidad optimo pa un persona drumi.
Uza manta cu peso
Si ta ansiedad ta e causa cu ta costa bo pa pega soño of bo ta lanta varios biaha den anochi, un manta cu peso lo por ta e solucion. E participantenan di e estudio publica pa Journal of Clinical Sleep Medicine a experimenta un disminucion significante di nan insomnio despues di a uza e manta cu peso durante 4 siman.
No obsesiona cu holoshi
Segun Dr. Bhanu Kolla, cu ta psikiatria di adiccionnan y experto den medicina di soño di Mayo Clinic na Rochester, Minnesota, cu mirando e ora na bo holoshi por ta demasiado stimulante. Y asina bo ta solamente aumenta bo ansiedad y e probalidadnan di drumi malo.
