ALGUN NOMBER CONOCI TA ENVOLVI DEN ‘PANDORA PAPERS’

Pandora Papers ta e nomber cu a duna e investigacion periodistico basa den un importante filtracion di documentonan confidencial di 14 proveedor di servicio offshore dedica na creacion di empresanan na paisnan manera Panama, British Virgin Isles y Bahamas. Na Spaña, El País y e cadena di television La Sexta ta partners den e proyecto aki, cu a conta cu e colaboracion di mas di 600 periodista di 117 pais bou coordinacion di International Consortium of Investigative Journalists (ICIJ). E otro medionan cu a participa den e proyecto, considera e colaboracion periodistico mas grandi di historia, ta inclui entre otro: Le Monde (Francia), The Guardian (Reino Uni), The Washington Post (Merca ), L’Espresso (Italia) y La Nación (Argentina).

Den e transcurso di casi dos aña, a analisa mas di 11,9 miyon file, incluyendo documentonan di texto, spreadsheets, emails y imagennan. Tin oprichtingsaktes, lista di accionistanan, factura, paspoort, registro di biahe… Hunto nan ta forma un snapshot instantaneo di e banda scondi di e finanzanan internacional y clarifica e secretonan di e paraisonan fiscal y e profesionalnan cu ta fungi como un brug. E leak ta apunta na mas di 27.000 compania crea entre 1971 y 2018, y alrededor di 30.000 di nan beneficiarionan. Entre nan tin 751 empresa vincula cu Spaña.

Cua ta e figuranan publico relevante cu ta aparece den Pandora Papers? E investigacion a revela e bienes secreto, acuerdonan confidencial y fortunanan scondi di e rico- y poderosonan: mas di 330 politico y personanan cu cargonan publico (90 di nan Europeo), 15 Hefe di Estado na Latino America ta entre e figuranan actual y pensionado, 46 lider empresarial Ruso rico cu influencia grandi politicamente, y 133 multimiyonario di e lista di e riconan di e revista Forbes.

• 

• 

Riba e escenario internacional, den e nombernan destaca ta inclui e presidente Chileno, Sebastián Piñera, ken a sconde shares di un empresa minero, ex-managing director di Fondo Monetario Internacional Dominique Strauss-Kahn, cu a evita di paga impuesto tempo cu e tabata traha como consultant. Tambe t’ey e Rey di Jordania, Abdullah II, hunto cu su 30 empresanan y tres mansion na Malibu, y e prome minister Checo, Andrej Babis, cu a utiliza un network offshore pa cumpra un chateau cu tin un cinema y dos piscina.

• 

• 

• 

• 

• 

Tambe ta aparece ex-prome minister Britanico Tony Blair y su casa Cherie, cu a cumpra un edificio victoriano na Londen balora na $ 8,8 miyon (€ 7,6 miyon). Tambe tin e figuranan di criminal manera Raffaele Amato, e capo di e mafia di Camorra Italiano cu a inspira e pelicula Gomorra, y cu a wordo deteni na e ciudad Spaño  Málaga na 2009. Tin algun strea di e mundo di moda y entretenimento tambe manera Claudia Schiffer, Julio Iglesias y Shakira. Entre e caranan conoci di e mundo di deporte ta aparece e nombernan di Carlo Ancelotti y ex- entrenado di FC Barcelona Pep Guardiola.  

• 

• 

• 

• 

• 

Den e investigacion Pandora Papers a revela e nomber tambe di e cantante, Luis Miguel, cu a cumpra na 2013 su yate Sky a traves di un empresa fantasma yama, Skyfall Marine Limited, crea p’e hunto cu su ruman Alex Basteri y su ex-asistente Joe Madera. Luis Miguel ta aparece, cu 50 mil shares como e unico doño di e compañía, segun un aandeelbewijs fecha 13 di juni 2013. Segun e documentonan obteni pa El País, Skyfall Marine a wordo crea cu un solo proposito: cumpra Sky. Den e documentonan tambe ta constata cu e placa pa e compra ta bin di e fortuna personal di Luis Miguel.