E prome lunanan di un Aña Nobo ta un momento perfecto, pa sinta reflexiona y confirma tur e metanan cu bo tin, pa e aña cu a caba di cuminsa. Sea e metanan den e area di finanzas, labor, bida familiar y matrimonial of kisas den e parti di salud. E metanan por yuda nos tin un sentido di direccion, di cual nos por sinti un satisfaccion inmenso, ora esakinan keda cumpli of realisa. Loke ta interesante pa sa ta, cu mayoria biaha nos metanan no ta keda cumpli of realisa, no pa falta di motivacion of interes, sino cu nos propio miedo y insiguridad ta stroba nos di haci esaki posibel.

Recientemente un persona yama Tim Ferris a realisa un concepto, cu a haya hopi popularidad rond di mundo yama ‘Fear-Setting’. E concepto aki ta basa riba e metodo cognitivo cu psicologo y e terapistanan, cu sa uza e asina yama; Cognitive Behavior Therapy. Mas cu claro esaki no ta un remplaso pa ayudo profesional, pero si e ta un herment cu nos por uza den nos bida diario, pa por ta mas exitoso y feliz den nos intentonan, pa realisa e meta- y soñonan grandi y chikito.

Pa por realisa bo soño- y metanan ta importante pa tuma algun momento pa medita y refleha riba bo miedo- y insiguridadnan. Cuanto biaha e miedo di realisa un meta a tene bo atras di haci esaki realidad? Cuanto biaha bo a yega di puntra bo mes kico por bay robes? Den situacion asina e mente automaticamente ta bay den su estado defensivo y ta crea diferente scenario, cu na final ta crea e ‘paralisacion di miedo’ cu nos tin: Excusa y pretexto ta forma como resultado di e miedo interno aki manera “mi lo wordo rechasa”, “mi no ta bon suficiente”, of “kisas mi no lo ta exitoso haciendo esaki”.

“Kico ta e cos di mas pio of malo cu por pasa?”.

Crea un lista di tur e scenarionan cu lo por tuma lugar of tur e cosnan cu por bay robes. E idea tras di esaki ta, cu bo ta haya e oportunidad pa mira preto riba blanco, kico tur ta bo miedo- of insiguridadnan, cu ta strobando bo di realisa bo meta. Ni con absurdo esakinan por ta, e ta importante pa ta honesto cu bo mes y eventualmente realisa cu esaki ta solamente un pensamento y no realidad. Un ehempel por ta: si mi tuma e curashi pa haci mi MBA of continua mi estudio banda di mi trabou, mi lo perde amistad como cu mi no lo tin tempo liber mas. E worst case scenario tambe por uz’e pa momento cu bo ta haci falta di curashi of tin miedo di tuma un decision grandi of chikito. Simplemente puntra bo mes “kico ta e cos di mas pio, cu por pasa si mi haci esaki?”.

“Con mi por minimalisa esaki di pasa?”

Nota con e pregunta di reflexion no ta con mi por preveni esaki di pasa, pero con pa minimalisa esaki. Hopi biaha nos ta enfoca riba preveni circunstancia, cu nos no tin control riba di esaki, cual por crea desapunto y frustracion. Despues cu bo a defini bo miedo of insiguridad, analisa cua accion bo por tuma den un forma SMART (specifico, por midi esaki, alcansabel, realistico, duracion di tempo), pa asina minimalisa e pensamento of posibilidad negativo aki di pasa. Por ehempel: traha cu un planificacion y deadlines, pa asina evita cu mi ta cay atras cu mi trabou, laga un persona controla mi trabou y ofrece feedback constructivo un bes pa siman, tuma 1 dia den siman pa enfoca riba famia y amistad como recompensa pa un siman productivo.

“Si e miedonan aki bira realidad kico mi por haci tocante esaki?”

Finalmente crea un lista di accion cu bo lo por tuma si e miedonan aki enberdad bira realidad. E paso final aki ta pone bo den un estado realistico, caminda bo ta bira creativo pa bin cu alternativa y no keda pega den e circulo vicioso di pensamento negativo.

Pa simpel cu e ta mustra, fear-setting tin hopi beneficio, cu por yuda nos realisa nos capacidad maximo y evita, cu nos no ta tuma paso grandi pa realisa meta y soño sea grandi of chikito. Cu esaki den mente, tuma accion ta bira algo normal y mas confortabel pa haci, mas cu claro haciendo esaki un habito y mantene e consistencia cu esaki. Tuma tempo pa examina kico ta algun miedo cu bo tin y mira con bo soñonan pocopoco lo por bira un realidad sigur.

LEAVE A REPLY

Please enter your comment!
Please enter your name here