Musica ta un herment hopi valioso pa regula nos emocionnan. E regulacion di emocion ta inclui e habilidad di monitor, evalua y modifica e reaccionnan emocional. Musica ta yuda trece un estado agradabel y ta yuda regula un persona su animo y sentimentonan. E hendenan ta uza musica den nan bida diario pa regula nan emocionan y pa kita e emocionnan menos agradabel; manera stress y cansancio.
1. Musica por wordo uza manera un ‘healing tool’
A ser demostra cu musica ta efectivo pa reduci ansiedad y e preocupacionnan, tambe e ta yuda alivia dolor fisico. E idea di uza musica den un manera terapeutico a existi pa miles di aña.
2. Miho concentracion
Musica ta yuda reduci e distraccionnan y ta mehora concentracion, por ehempel ora di haci deporte, fitness, meditacion y trabou. Den un investigacion nan a observa cu e canticanan cu ta zona alegre, compara cu e musica tristo, tabata asocia cu menos distraccion den e mente. Esaki ta importante door cu e pensamentonan negativo, ta un problema pa hopi hende cu trastorno psicologico manera depresion.
3. Comportacion di e consumidor
Musica por afecta inconscientemente nos estado di animo y influencia nos ora di haci compra. Ora un cantica tin un ritmo rapido nos ta move mas lihe. Ora e canticanan mas trankilo y lento ta toca, nos ta tuma mas tempo pa cana y wak rond den un tienda. E ritmo di musica tambe por influencia e forma con e clientenan ta come y bebe den un restaurant. Si e meta ta pa hende come y sali rapido for di e restaurant, generalmente ta uza musica mas rapido.
