Superman lo declara cu e ta bisexual y lo cuminsa un relacion romantico cu su miho amigo, a keda revela awe pa DC Comics, net despues di dos luna cu e compania a anuncia cu e compañero icono di Batman, Robin, tambe ta bi. E noticia ta marca loke DC Comics ta califica como un ‘bold new direction’ pa e legendario super heroe, un movimento cu a cuminsa na juli, ora e compania a debuta cu un serie nobo di comics cu e personahe Clark Kent y yiu di Lois Lane, Jonathan, cu a hereda e rol di su tata cu tin e capa bisti.
Desde e debut di e serie Superman: Son of Kal-El, Jon, di 17 aña, a trece dilanti varios tema cayente manera e tiramentonan na high school, cambio climatico y deportacion di e refugiadonan. E personahe awo ta dal un paso grandi pa separa di su storia original asina stima di Superman pa ‘date’ su amigo cercano, cu e romance cla pa ocupa un luga central den un proximo edicion di e strip, cu ta ser lansa dia 9 di november.
Sinembargo e relacion entre personanan di mesun sexo a ser inspira den icono romance entre Clark y Lois, y DC Comics a revela cu e compañero nobo di Superman, e refugiado ‘hacktivista’ Jay Nakamura, tambe ta un reportero, mescos cu e mayornan di e hoben super heroe, “Mescos cu su tata prome cu ne, Jon Kent a namora di un reportero”, e compania a bisa den un comunicado di prensa.
Papiando riba e decision pa duna Superman un historia LGBTQ +, e escritor di e serie Tom Taylor a bisa na New York Times, e tabata kier cu e version nobo di e personahe ta relevante pa un audiencia moderno, insistiendo cu el a sinti manera un ‘oportunidad perdi’ pa un biaha mas retrata e super heroe como un ‘straight white savior’. “Un Superman nobo mester tin e peleanan nobo, e problemanan real di mundo, cu e por enfrenta manera un di e personanan mas poderoso di mundo”.
