Cu hopi placer Aruba Tourism Authority (A.T.A.) ta anuncia cu e prome edicion di e Aruba Global Travel Conference tabata un exito rotundo. E conferencia cu a tuma luga riba nos isla entre 18 cu 21 di september, a culmina diahuebs anochi cu un celebracion special na Royal Aruba Aloe. E prome Aruba Global Travel Conference a trece hunto un total di 59 participante for di Merca, Colombia, Italia, Spaña, Mexico, Suiza, Brazil, Argentina, Chile y Paraguay, pa menciona algun. Banda di esaki hopi otro socio cu ta representa entre otro nos hotelnan tambe a biaha pa tey presente. Un total di 70 a bishita nos pa e conferencia aki. Ta pa prome biaha cu A.T.A. a combina e mercadonan mas clave pa nos isla, esta Norte America, Latino America y Europa den un solo conferencia.
Durante henter e siman, participantenan y socionan di mundo di turismo a gosa di intercambio productivo. E programa a cuminsa dialuna anochi cu un ceremonia di apertura, sigui pa presentacionnan clave diamars mainta durante di e Global Travel Conference den cual A.T.A. a comparti e resultadonan anticipa pa 2023 y e strategianan primordial pa 2024.
Entre otro a pone atencion na e “E Efecto di Aruba” – e capa di promocion y strategia di comunicacion internacional pa Aruba. Por menciona cu concepto presenta a ricibi un impacto positivo entre e invitadonan. Tambe a para keto na entre otro High Value, Low Impact cu ta inclui- calidad di bida di e residente, calidad di e experiencia di e bishitante, proteccion y conservacion di nos naturalesa, y contribucion economico na e sector turistico, forsanan interno y externo manera seguridad, aumento di camber, forsa laboral, y Carrying Capacity. Hunto cu esaki, por a conta cu un panel den e mercado di Niche cu a inclui gastronomía, naturalesa, y boda.
E programa a continua cu un Mercado Turistico (Marketplace) cu a tuma luga diaranson pa e mercado di Latino America, y diahuebs pa e mercado di Norte America. Durante e evento interactivo aki, participantenan a reuni cu ehecutivonan local den turismo. E Mercado Turistico a conta cu participacion di mas di 35 socio local, entre otro hotelnan, companianan di tour y otro operadornan turistico. Cada un di socionan aki tabata tin espacio pa 20 cita pa dia cu ehecutivonan internacional, caminda cu por a explora oportunidadnan di negoshi y establece relacionnan duradero.
Aparte di e reunionnan programa, invitadonan internacional por a gosa di diferente experencia rond di nos isla. Di e forma aki, a percura pa nan tin un bon impresion di e isla y pa nan ta bon informa tocante e producto turistico y futuro desaroyo. E reaccion pa e prome edicion di e Aruba Global Travel Conference ta sumamente positivo, tanto cerca stakeholders local como tambe cerca e participantenan internacional, cu a inclui varios persona cu ta bishita Aruba pa prome biaha. A.T.A. ta optimista cu e conferencia aki lo sirbi como un plataforma importante pa yuda nos isla logra metanan stipula, crea oportunidadnan nobo y asina enrikece nos mercadonan turístico, pensando aki riba diversificacion di nos mercadonan tambe.
 ta anuncia cu e prome edicion di e Aruba Global Travel Conference tabata un exito rotundo.){kind=link}