Facultad di Hospitalidad y Turismo na Universdiad di Aruba ta sumamente orguyoso y honra cu e logra di Dr. Kimberly Grêaux. Recientement, famia, amigonan y coleganan di Kimberly Grêaux a bini hunto na Maastricht, Hulanda pa presencia e ceremonia di defensa di PhD di su disertacion titula: “Optimizing the Implementation of Integrated Health Promotion Packages: An Analysis in the Context of Intersectoral Health Policymaking in 34 Dutch Projects of the Governmental Program Gezonde Slagkracht”. Dilanti un comision cu a consisti di profesornan di Maastricht University, Radboud University, y PhDs emplea na e “ Departamento di Salubridad Publico Local di Valkenburg y Maastricht (GGD)”, Kimberly a contesta preguntanan critico relaciona cu su estudio. Despues di a defende su disertacion exitosamente, Grêaux a ricibi su doctorado di e Faculty of Health, Medicine, and Life Sciences di Maastricht University.
Kimberly a nace y biba na Aruba. Despues di a obtene su diploma di VWO na Colegio Arubano, Kimberly a bay Hulanda pa sigui cu su estudio na Vrije Universiteit van Amsterdam. Kimberly tin un Bachelor’s degree den Pharmaceutical Science y un Master’s degree den Health Science, cu specialisacion den Prevencion y Salubridad Publico, y tambe Nutricion y Salubridad Publico. Despues di un aña ta traha como Research Assistant y Junior Researcher riba varios proyecto relaciona cu un metodo integral pa preveni sobrepeso, Kimberly a aplica pa forma parti di e proyecto Local50. E proyecto aki a ricibi fondo di e Ministerio Hulandes di Salubridad Publico, y Deporte pa evalua e programa Gezonde Slagkracht unda pa prome biaha a ortoga subsidio na diferente municipio na Hulanda pa explora e implementacion di metodonan integral pa promove un estilo di bida saludabel. Kimberly a bira un candidato di PhD bou guia di prof. dr. Nanne de Vries, dr. Patricia van Assema, y dr. Kathelijne Bessems. E proyecto aki a culmina den un disertacion explorando e topico con pa promove y implementa metodonan comprehensivo pa mehora salud en general.
Mundialmente malesanan cronico y no transmisibel ta e causo primordial di mayoria problemanan cu salubridad publico ta enfrentando. Mayoria biaha e malesanan aki ta relaciona cu habitonan no saludabel manera nutricion pober y un bida sin movecion. Grêaux’s su estudio a enfatisa e necesidad pa implementa “intersectoral health policymaking” pa soluciona e problemanan aki efectivamente. Apesar di e recomendacionan global, su implementacion ta enfrenta obstaculonan, primordialmente debi na e proceso complica pa inclui diferente tipo di sector banda di sector di salubridad publico. Uzando un compilacion di data midi na comienso, durante y na final di cada un di e 34 proyectonan obteni a traves di metodonan cuantitativo y cualitativo, cerca diferente partners concerni cu e proyectonan. E estudio a explora e proceso y e importancia di tin colaboracion intersectoral pa por facilita implementacion di maneho pa salubridad publico. Aki ta enfatisa e importancia di tin diferente tipo di partners y di diferente sector envolvi den e proceso y tambe e rekisitonan pa por facilita e proceso aki.
Adicionalmente, e estudio a examina e rol di e “Dutch Recognition System” un database Hulandes pa sostene metodonan basa riba evidencia y ta subraya e problemanan cu ta enfrenta, manera uzo minimo di un database y espacio limita pa adapta un metodo den un otro contexto. Por ultimo, e disertacion ta enfoca riba e posibilidad di por premira riba posibel bareranan di un metodo basa riba e caracteristicanan di e metodo mes, pero tambe caracteristicanan di e luga di implementacion di e metodo. Cu e resultadonan aki, Grêaux y su team ta spera di por contribui na mehora y facilita e maneho actual di salubridad publico na un manera efectivo cu perspectivanan innovativo. Actualmente, Kimberly ta un Assistant Professor na Universidad di Aruba, Facultad di Hospitalidad y Maneho di Turismo (FHTMS), unda e ta preparando pa sigui amplia su carera academico.
