RA BEAUTY ACADEMY: “E PRINCIPIO DI UN GRAN SOÑO”

Di e deseo profundo di Roberto Avalo pa comparti tur locual el a siña durante su carera, su inspiracion a nace pa crea RA Beauty Academy. Su vision no ta solamente pa converti den e academia di referencia na Aruba sino tambe un centro di excelencia pa henter Caribe. Cu den e proximo añanan, Aruba lo cera conoci como un luga unda talento, educacion y creatividad den industria di beyeza ta florece. Mas aleu cu solamente beyeza, RA Beauty Academy por bira un institucion cu ta forma lider, empresario y ser humano cu tin e confianza pa crea oportunidadnan pa nan mes y pa otro persona.

Si Roberto Avalo mester describi e ultimo añanan aki den ambos aspecto di su bida den un par di palabra, esakinan ta: crecimento, resiliencia y gratitud. Profesionalmente cada reto, cada oportunidad y cada sacrificio a form’e den e persona cu e ta awendia. El a logra construi un carera cu no solamente ta yen’e di orguyo, sino cu ta permiti’e inspira y comparti su conocemento cu otro hende. Personalmente Aruba a siñ’e cu bida ta mucho mas cu logra exito. El a madura hopi, el a conoce su mes miho y den e proceso, el a compronde cu e berdadero exito no ta solamente loke bo logra ni loke bo ta mustra na mundo, sino e impresion cu bo laga atras den otro hende como legado. Gratitud tambe a bira un di e balornan mas importante den su bida. Roberto ta profundamente agradeci pa cada oportunidad cu el a ricibi, pasobra e ta kere cu ningun logro lo por ta posibel sin e hendenan cu a kere den bo y a habri un porta pa bo.

Beyeza, Moda y Imagen

E bashi den e industria di beyesa cu e ta kere ta esun di mas grandi, no ta falta di talento, pero ta falta di direccion, preparacion y oportunidad. Tin hopi hende cu tin un don extraordinario, pero nan no sa con pa desaroy’e, no tin acceso na educacion di calidad of simplemente no tin un hende cu ta kere den nan. Roberto kier yena precisamente e bashi ey. Su vision ta crea cu RA Beauty Academy un ecosistema unda educacion, excelencia y desaroyo personal ta bay hunto. E no kier forma solamente bon profesionalnan den beyeza; e kier forma lidernan, empresarionan y sernan humano cu tin confianza den nan mes, cu sa con pa representa nan mes y nan pais cu orguyo. E ta desea cu Aruba bira un punto di referencia den Caribe pa educacion den industria di beyeza, moda y imagen personal. Cu en bes di manda talento bay busca preparacion afo, otro paisnan tambe cuminsa mira Aruba como e luga unda excelencia ta nace.

Talento, Creatividad y Capacidad

Conocemento no mester keda cu un solo persona, pero mester wordo comparti pa otro tambe por crece. Esey semper tabata e filosofia di Roberto Avalo. E tabatin un combersacion cu nunca e lo lubida. Ora el a comparti e proyecto aki cu Aurora, el a cont’e cu na e cuminsamento di FOCUS un hende a puntr’e: “Pakico bo lo crea un revista si na Aruba nos no tin artista, cu ta super strea ni celebridad? “Su contesta tabata simpel, pero poderoso: “Si no tin, nos mester crea nan. Algun caminda nos tin cu cuminsa”. E pensamento a keda cu ne, pasobra e ta identifica su mes completamente. Durante hopi aña a custuma di manda nos missnan y candidatanan bay otro pais pa nan preparacion, manera cu si e oportunidadnan grandi semper mester bini for di exterior. Pero semper el a kere cu nos tin talento, creatividad y capacidad suficiente pa crea e mesun nivel di excelencia aki riba nos propio isla.

Eleva nos Region riba Mapa Internacional

E tempo cu a tuma pa realisa RA Beauty Academy for di e concepto te finalisacion di e proyecto, Roberto ta bisa cu e soño aki a cuminsa como un vision hopi aña atras: “Durante mas cu dies aña mi a dedica mi mes na educacion, preparando estilistanan, missnan y profesionalnan na diferente pais. Cada experiencia a fortalece mi conviccion cu Aruba tambe lo por ta un centro di excelencia. Pero e proyecto cu ta mira awe a tuma aproximadamente dos pa tres aña di planificacion intenso. No tabata solamente construi un espacio fisico, sino defini un filosofia, un metodo di enseñansa y un identidad cu realmente por marca diferencia. Mi a tuma mi tempo, pasobra mi no kier habri simplemente un academia. Mi kier habri un institucion cu por cambia bida, cu por keda relevante pa hopi aña y cu lo sigui crece aun ora mi mes no ta presente. Pa mi RA Beauty Academy no ta e finalisacion di un proyecto. E ta solamente e principio di un soño hopi mas grandi”.

Orguyosamente pa e edicion di Focus Digital Magazine di augustus, e portada ta ilustra Roberto Avalo hunto cu algun di e personanan cu e tabatin impacto den nan bida. Cada uno ta comparti con nan a conoce y nan prome impresion di RA Beauty Academy. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)