E strea conoci pa e peliculanan manera: ‘22 Jump Street’, ‘Superbad’ y ’Wolf of Wallstreet’, a pidi pa e hendenan no haci mas comentario riba su curpa den un mensahe publica riba Instagram diaranson. E ta bisa: “Mi sa cu boso tin bon intencion, pero mi ta pidi amablemente pa boso no papia riba mi curpa”. Jonah ta agrega: “Bon of malo, mi kier laga boso sa cu cortesia, cu e no ta yuda y no ta sinti bon. Hopi respet”.
Jonah a skirbi den pasado tocante di su experencianan cu ‘bodyshaming’ y su ultimo post a haya hopi apoyo di otro celebridadnan y fanatico. Hopi di nan a aplaudi su decision pa establece un limite. Durante su carera, Jonah Hill tabatin semper hopi atencion riba su curpa. Un par di luna pasa e actor a comparti riba su Instragram su luchanan cu su ‘body image’. E ta conta cu finalmente e ta siñando di stima su mes despues di tanto aña. Na februari, el a comparti un screenshot di un articulo di Daily Mail, unda nan a mustra un par di potret di dje den un trahe di baño. El a bisa: “Mi ta kere cu nunca mi a kita mi franel den un pool te ora mi tabatin 30 aña”.
“Probablemente e lo a pasa prome, si mi insiguridadnan di mi infancia no a ser exagera durante e añanan di a wordo trata manera un burla door di mi curpa pa media y entrevistadonan”.
El a bisa tambe cu e idea cu media tin pa purba di hunga cu ne door di ‘stalking’ mientras e ta surf y publica e potretnan ya no ta causa molestia. E tin 37 aña y finalmente e ta stima y acepta su mes. Na augustus, Jonah Hill a revela un tattoo nobo pa celebra su dedicacion na amor propio. E tattoo ta riba su lomba y ta skirbi ‘Body Love’ y ta inclui un dibuho cu ta parce e logo di Body Glove, e compañía di paña pa e deportenan acuatico.
