Miss Teen Aruba, Ashantee Martus, ta un di e candidatanan di e diferente nacionalidadnan cu ta concursando pa e corona Miss Cultura Continental na Siguatepeque Honduras. E certamen a inicia dialuna 17 di februari y lo tin su culminacion awe nochi cu e evento di ‘Coronación de Teen Cultura Continental’ y ‘Miss Cultura Continental’. Aruba su representante ta un hoben masha dinamico, ken ya for di chikito ta riba escenario, sea ta bailando, cantando of den concurso di beyesa.
Ashantee a participa hopi biaha den Festival di Calypso y Roadmarch, y despues tambe a involucra su mes den diferente concurso di beyesa tanto local como internacional. E ta pertenece tambe na e grupo di baile New Timibiche, pues mester bisa cu Ashantee por domina escenario hopi bon. Aña pasa Ashantee a competi den e concurso di Miss Teen Aruba International y el a keda como 1st Runner Up MTAI. Esaki a dun’e tambe e derecho pa representa Aruba na nivel internacional y p’esey mes e ta representa GLW Foundation na Honduras den Miss & Teen Cultura Continental.
Den un combersacion cu e Director Nacional di Aruba, George Winterdaal, el a expresa su enorme satisfaccion y ta hopi orguyoso pa e presentacion di Ashantee Martus den e certamen. El a logra caba e premionan di Mejor Traje Tipico y Mejor Danza Regional den e pre eliminar. Segun George cu di tur e actividadnan, esun cu Ashantee mas a impacta tabata e Danza Folclórico, unda el a demostra cu e por baila loke ta cultura. El haci tambe un ‘surprise twist’ na final cu a inclui carnaval, lagando tur hende ‘flabbergasted’ cu su costuum.
Miss Teen Aruba no a haya solamente hopi atencion di e otro candidatanan, pero tambe di e mayornan of e representantenan di e diferente paisnan. Nan a keda encanta cu e diversidad den su estilo tanto su vestuario, makiyahe como peinado, unda cada dia e tin un look diferente den e eventonan. Esaki ta danki na e coach cu ta encarga pa su look completo, Endy Croes, cu ta 14 competencia internacional cu e ta acompaña un candidata.
Ashantee a bay bon prepara Honduras y tabatin varios training intensivo pa loke ta pasarela, public speaking y desaroyo general. Como cu Ashantee a cuminsa di hopi jong caba riba stage, esey ta haci cu e no tin miedo di escenario y tampoco enfrenta un publico. E team di Aruba tin 100% confiansa cu awe nochi Ashantee Martus ta bay haci un tremendo presentacion.
Riba e pregunta na George Winterdaal, cua ta e candidata cu e ta mira como un competencia fuerte pa Miss Teen Aruba, el a contesta cu e pensa cu kisas e por ta Miss Teen Republica Dominicana. Dicon? Pasobra ambos candidata tin mesun color di piel, nan ta halto y tin mas experiencia pa loke ta participacion den concurso. Un palabra di PABIEN ta bay pa GLW Foundation y George Winderdaal cu e score di 40 concurso internacional, cu e participacion di Ashantee Martus na e certamen di Teen Cultura Continental na Honduras. Exito Miss Teen Aruba ??
