E evento exclusivo di networking “Santander ta yega Aruba”, a bira un gran exito y a logra pone e departamento Colombiano di Santander den e spotlight di e sector turistico y comercial di Aruba. E actividad a conta cu un asistencia amplio di agencia distribuidor, agentenan di biahe, companianan di seguro, otro representantenan di sector priva y miembronan di prensa local, demostrando e gran interes cu tin pa e destino nobo aki.
E evento organisa pa Gobierno di Santander, Secretaria di Cultura y Turismo di Santander, ProColombia y Camara di Comercio di Bucaramanga, cu e meta di fortalece e lasonan comercial y turistico entre Aruba y Santander. E invitadonan a conoce di cerca e diferente oportunidadnan cu Santander tin pa ofrece, incluyendo turismo di aventura, naturalesa, gastronomia, bienestar, cultura, turismo medico y oportunidadnan comercial y di inversion.
E organisadornan a expresa nan satisfaccion cu e interes y entusiasmo demostra durante e evento. “Nos ta sumamente contento cu e respuesta positivo cu nos a ricibi for di e mercado Arubiano. E asistencia y e interes sincero di e diferente sectornan ta confirma cu tin un gran potencial pa crea relacionnan comercial, turistico y economico entre Aruba y Santander. Nos ta spera cu e prome paso aki lo habri porta pa hopi colaboracio fructifero y oportunidadnan nobo pa tur dos destinacion.”
Ademas di turismo, e encuentro a brinda espacio pa dialogo tocante oportunidadnan den comercio, seguro, salud, enseñansa, retail y inversion, fortaleciendo e deseo comparti pa sigui amplia e cooperacion entre Aruba y Santander. E organisadornan ta mira cu confiansa pa futuro y ta spera cu e relacionnan establece durante e evento lo resulta den proyectonan concreto, mas intercambio comercial y un crecemento mutuo cu lo beneficia tanto Aruba como Santander.
Enfasis a ser poni riba e miho conexion aereo, cu ta haci Santander e destino mas cercano di Colombia pa Aruba, cu un tempo di vuelo di 1 ora aproximadamente, mas cortico cu cualkier otro ciudad principal den Colombia. Cu e vuelonan directo cu WINGO pa Bucaramanga awor por probecha tambe pa explora e bunita ciudad aki. E vuelonan ta tur siman riba diaranson y diasabra. E ruta aki lo ta temporal te cu 15 di augustus.
