E aña aki “DUBAI WINE GALA” a surpasa tur espectativa y resulta un bes mas den un exito rotundo. Renaissance Convention Center a keda comberti den “DUBAI NIGHT” caminda e glamour, elegancia y sofisticacion a keda refleha den e decoracion fabuloso realisa pa House of Mosaic Event Planners. Sigur nos por cataloga e ‘wine gala’ di Kiwanis Club of Aruba como un top evento unda cu tur e personanan cu a cumpra un ticket, cu ademas di a contribui pa un bon causa a experiencia un anochi espectacular.

Un di e highlight di e anochi tabata e video mapping crea pa Egmar Irausquin, cu ta e prome biaha cu el a crea esaki pa presenta den Renaissance Convention Center. Un atraccion hopi gusta tabata e tent estilo Arabe, unda tabatin henna tattoo painting y e virtual reality. Mientras cu paden por a disfruta di e atraccionnan bou di e tent, e parti pafo na entrada tabatin e Hookah Lounge unda por a huma tabaco treci special for di Jordania.

Den Renaissance Convention Center e companianan di biña a presenta nan booth decora cu originalidad den e tema y mester menciona cu e buffet cu cuminda arabe prepara pa e chefnan di Renaissance a ricibi hopi compliment. Manera tur e fiestanan di Kiwanis Club of Aruba unda e bon musica ta otro highlights, e biaha aki e combinacion musical poderoso tabata den man di ‘N Fuzion, Blue Boulevard y Buleria. DJ Edson Tromp a pone esnan di tur edad goza den style di disco cu efectonan di luz di ELITE Productions.

 

No por a falta e belly dancers den e fiesta aki cu e bailarinan: Jolanda Salas y su yiu muher Shandeeh Geerman.

Den e estilo cu Kiwanis Club of Aruba a presenta ‘DUBAI’ a duna esunnan cu a asisti na e fiesta, e oportunidad pa luci elegancia y estilo cu un toke special den nan vestuario. E premio pa “Best Dressed Couple” a ser entrega na Lorena Maduro y Addycito Toppenberg. E “door prize” cual tabata un travel voucher balora na AWG 2500 a ser gana pa Judela Chirino. Pabien na Kiwanis Club of Aruba cu un evento extraordinario.

LEAVE A REPLY

Please enter your comment!
Please enter your name here